Bandièra01 1180x150: Comuna de Tolosa

editorial

Fagam lo Twitter nòstre

Es plan sauput qu’es practicament impossible de viure plenament en occitan. Es pas solament una question de manca de ressorsas culturalas, literàrias o jornalisticas. Es pas tanpauc solament una question de manca de reconeissença legala de la part de França e de sa politica culturicida que cèssa pas. Es, mai que mai, la manca de locutors e lor dispersion, çò que provòca que los occitanofòns ajam e patiscam la sensacion d’èsser isolats e d’èsser los darrièrs parlants de la lenga. Aquela situacion, e mai s’es angoissosa, es mai una percepcion qu’una realitat e se pòt combatre eficaçament. Per exemple, amb l’usatge intensiu dels rets socials.
 
D’aqueles rets, n’i a un que cresèm que pòt donar un grand impuls numeric a l’occitan e a sa comunautat de locutors, especialament: es Twitter. O avèm ja dich en d’autras escasenças. Twitter es un ret social que permet quatre causas fondamentalas. La primièra es de trobar e seguir d’usatgièrs amb las meteissas inquietuds e chepics. Dins lo cas occitanista, lo perfil es fòrça clar. Lo segond es que permet d’escambiar d’informacions e de ressorsas, en multiplicant la portada e l’impacte de las iniciativas. Dins lo cas occitanista, insistissèm, aquò es un besonh fòrça urgent. La tresena granda vertut de Twitter es que permet de discutir, aprene, dialogar e debatre amb una comunautat d’interèsses comuns d’un biais rapid e dirècte. E la quatrena vertut es que permet de conéisser d’autras personas amb las meteissas intencions per poder bastir ensems de rets reals e de practicas amb de tòcas concretas. E, coma estrena, una cinquena vertut: Twitter es una plataforma excellenta d’emplegar amb lo telefòn mobil.
 
Per aquò, vos demandam a totes de far l’assag. Creatz uèi meteis un perfil sus Twitter. Es pas brica malaisit e es absoludament gratuit. Ensajatz-o pendent un mes. S’après far la pròva vos a pas convencut, podètz barrar lo perfil. Mas se comprenètz la dinamica e trobatz de bons twitterejaires e mai de bons seguidors, e s’emplegatz l’occitan, sèm convencuts que descobriretz que sètz pas los sols occitans conscients d’èsser occitans, sèm mantes e sèm totes mai près que çò que pensam. I sèm!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
6.

#5 De campanhas! De segur! :)

  • 4
  • 0
Gerard Joan Barceló Pèiralata
5.

Me creèri lo compte ièr. Se sèm mai de twitterejaires qu'òm pensa, caldrà organizar de companha sus Twitter: #occitan, #occitanofficial, etc.

  • 5
  • 0
Víctor Capdet Vilanova i la Geltrú, Catalunya
4.

Soi al twitter e pòdi escriure en occitan qualque còp perque seguissi de monde d'Occitània e eles me seguisson a ieu. Estúdii occitan, soi luènh d'Occitània e tan Twitter coma Facebook me permeton legir e escriure en occitan e quitament conversar. Cercatz-me @victorcapdet.

  • 5
  • 0
Jp la rapieta
3.

Me songe coma lu Günter Grass, faça-boq o toïtèr son de la marda, màs bona per dire EDR-LOL-PDR e far se lusir l'embonilh.
Emai i ne'n aguesse un « d'occitan », 'quò será un còp de mai per 'ver los mesma apres balhar los bons o les meschaënts punts.
http://rapieta.wordpress.com/2013/11/19/gunter-grass-quittez-facebook-cest-de-la-merde/

De segur que jaspisse aquí un liam per far montar mas statisticas, las mias estatisticadassadas.

:-)

JP

  • 3
  • 0

Escriu un comentari sus aqueste article