Bandièra01 1180x150: Comuna de Tolosa

editorial

Que se passa amb l’Estivada?

| Estivada de Rodés
La question que pausa lo títol d’aqueste editorial es una question que, malastrosament, a pas de responsa. Puslèu, es possible qu’aja una responsa, mas a l’ora d’ara la coneissèm pas amb certitud. Pressentissèm que i a quicòm d’estranh que truca a l’entorn de l’Estivada de Rodés, lo melhor e lo mai grand festenal de las culturas occitanas que se celèbra dins lo país nòstre. Pendent fòrça annadas consecutivas, la capitala de Roergue es venguda l’epicentre de la lenga, la musica, la literatura e la fèsta occitanas. Es talament aital que Rodés es venguda una vila famosa e coneguda en tota Occitània per aquel fach, e lo director del festenal, En Patric Roux, es vengut una celebritat occitana. Alavetz, l’Estivada es un patrimòni de totes los occitans e tot çò que li pòsca arribar es una nòva de portada nacionala e un chepic per totes.
 
Sabèm ben qu’En Roux a anonciat publicament que dirigirà pas l’edicion que ven de l’Estivada de Rodés. N’a pas volgut explicar los motius publicament e s’es limitat a brandar de rasons personalas. Sus aquelas rasons personalas n’a pas volgut donar d’explicacions concretas, çò qu’a aumentat paradoxalament lo desir de saber çò que se passa amb l’Estivada. Lo mistèri e l’incertitud planan sus aquela question que, per sa condicion de festenal multitudinari e publicament subvencionat, requerís las maximalas transparéncia e informacion publicas. La sola causa qu’En Roux afirmèt es que la còla qu’a dirigit es perfièchament capabla de manténer viu lo festenal e que totas las regions occitanas sostenon l’Estivada. Saique seriá una bona causa que l’interès mediatic quitèsse d’èsser sus En Roux e que foguèsse la Comuna de Rodés qu’expliquèsse quals son sos plans per l’Estivada de l’an que ven, perqué i a agut un cambiament en la direccion e qui ne serà lo director en 2016. Las responsas a aquelas questions permetrián d’esclarzir un pauc la confusa situacion actuala.
 
Cossí que siá, dins aqueste estranh afar tot emplenat de mistèris, i a quicòm qu’es segur: Jornalet sostendrà incondicionalament quin que siá festenal cultural occitan, siá l’Estivada de Rodés, siá quin que siá autre festenal que se pòsca far dins quina que siá autra vila occitana, amb quin que siá nom e amb quin que siá director. La sola condicion que pausam es que siá un festenal vertadièrament occitan, e pas un succedanèu ont la cultura occitana siá lo maquilhatge superficial d’un festenal cultural francés. Nos cal, doncas, seguir aquela question e seguir la pista de Patric Roux: solament lo cal conéisser un pauc per saber que totjorn es a perpensar quicòm, qu’es un trabalhador infatigable e que sa leiautat a Occitània degun la pòt pas arrestar.
 
 
 
 

Jornalet 25.7.2015. Patric Roux: “Pòdi pas respondre a aquesta question e pòdi pas dire perqué”

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

manjacostel Muret
16.

Ieu lo festenal que m'agrada mai es lo marathon dels mots de Tolosa ont lo francés se tròba en dangièr de mòrt, coma cadun o sap . Costa a pron pena 500 000 euros ; ren qué!
Lo torn de França còsta la pèl del cuol , mas los conses son contents, se'n parla a la tele . L'an que ven aurèm benlèu de jòcs e de cirqs, de luta de femnas nudas dins lo fangas , tot çò que se pòt veire a la tele americana , o per qué pas la renaissença d' Intervila , l'emission culte e culturala carida dels conses occitans...
Aquò's una brava cultura del resultat .... electoral.
Per l'elegit occitan, mantuns còps, la lenga d'òc reverta una patana cauda, sembla qu' a "recebut" la consinha "estrategica" , d'acompanhar la morenta , tot en fasent de grimaças a " minima" .
E serià pas estonant que l'estivada sià forçada de s'exiliar dins una autra vila de la granda region "Sud de France" cara a Delga.

  • 1
  • 0
Roucau
15.

L'univèrs occitanista e lo son imaginari pesucàs, hèit de Catars e de plorassejadas, que s'an mancat atirar ua joenessa creativa e dinamica.

L'occitanisme que viu a l'embarrat, dens l'autosatisfaccion.

  • 2
  • 12
Felip Martèl Montpelhier
14.

#13 Lubat es estat efectivament conoissut nacionalament drant d'o esser uzestament, e son festenau es un festenau de jazz coma n'ia per camions entiers au bon soleu dau sud (n'i a finda un a Barceloneta...). Es doncas legitim als uelhs dels cultureux ordinaris. Apondetz a aquo la caissa de resonànca que representa Francis Marmande, una de las plumas dau Monde, e comprenètz tot.
Lo problema vertadier es la visibilitat : dins una brochaüra suus festenaus dau sud ont caupon los festenaus d'Avairon, l'i a ren sus l'Estivada. Lor vau demandar perqué, veirei ben se respondon. E ren despuèi d'annaas sus las tieras donaas per Le Monde e Libé. Roux, quand li avio pausat la question, m'avia dich que los avia totun assabentats...

  • 7
  • 0
Emmanuèl Isopet
13.

#12 Vertat que lo festenal d'Uzesta (supausi qu'es d'aquel que parlatz) es present dins los medias, coma los festenals portats per una personalitat mediatica. Foguèsse lo festenal de d'un desconegut auriá pas un mot dins la prensa es pas un sòu de subvencion (que Uzesta fonciona tanben amb de subvencions).
La diferéncia de budget amb l'Estivada se vei a l'uèlh tre que vos passejatz dins l'un e l'autre endrech.
La concepcion de la cultura occitana, sabi pas s'es mai « globala » a Uzesta, mas se vos legissi plan, lo punt màger es la creativitat : pensi pas que los artistas presents a l'Estivada sián mens creatius que Lubat e los artistas convidats en Gasconha… o alara ai mal comprés vòstre prepaus. O alara caliá comprendre que Bernard Lubat el, aviá una preséncia globala a Uzesta !;-) [es pas per lançar de polemica, mas nòti dins lo programa : DIMENGE miègjorn : apero blues « l'accordéon jazzcogne de Lubat », 21h30 La translucide de Lubat, « Improvision » piano solo de Lubat en venda a la librariá de l'Hestejada, DIMARS 22h creacion de la Cie Lubat et invités, DIMÈCRES 12h « les soixantes disants » de e per Franois Marmande e Bernard Lubat, DIJÒUS « entretiens artistique et politique : entre autre… Lubat », 21h30 « La nuit des mots vivants » e la Cie Lubat, DIVENDRES 10h debat amb… Bernard Lubat, a 21h30 « transartisticités » amb entre autre B. Lubat, idem per la serada de DISSABTE amb la Cie Lubat. E lo DIMENGE? A 15h30 un filme « Lubat père et fils » a 17h concert « insolistitudes magnétiques » amb B. Lubat. Urosament que P. Roux es pas tant programat a l'Estivada]
Se comparam amb los autres festenals en França, vesi pas de « pecat original » a l'Estivada…

  • 14
  • 0
garric
12.

Cada annada, n'i a un que fa venir dètz milas personas dins son vilatjòt de Gasconha e atira l'atencion de la critica nacionala e internacionala ambe un budget derisòri. Vertat qu'aquel òme a una concepcion globala de la cultura occitana qu'es pas la de l'entre-se occitanista que senhoreja a Rodés. La capitada d'una manifestacion culturala es fondada d'abòrd sus sa creativitat. Lo budget es pas qu'una aisina. Lo pecat original de l'Estivada, es qu'es mens lo fruch d'una ambicion creatritz que d'una volontat politica apevada sus de subvencions. Se paga pesugament auèi. Per se salvar l'Estivada a besonh de creatius mai que d'entrepreneires, quitament talentuoses. O alara dels dos. De debatre.

  • 3
  • 8

Escriu un comentari sus aqueste article