Brava suspresa dissabte als Minimes ont Avinhon bastís sa victòria dins lo darrièr quart d’ora del primièr temps per menar 22-4 a la pausa e l’emportar 40-16 fàcia al Tolosa Olimpic. Los Provençals s’asseguran lo dreit de jogar la partida de barratge per las semifinalas a l‘ostal.

 

Autra suspresa dimenge a Vilanòva d’Òlt ont los Leupards, eliminats dempuèi bèl briu, fan plegar los campions Lesinhan 29-22. La formacion de Corbièras es a l’arrèst aquesta prima, mas jogarà probablament son barratge a domicili.

 

Carcassona s’assegura la qualificacion dirècta en ganhant jos la pluèja fàcia a Montpelhièr una partida ont capitèt pas de desvolopar son jòc e de concretizar sa dominacion: 26 a 12.

 

En Cup, los Dracs anavan desfisar la formacion d’Hull KR. Aquò comencèt plan pels Catalans per un ensag de Leon Pryce a la uèitena minuta, puèi lo dobertura tornava darrèr la linha abans un ensag del talonaire Henderson just abans la pausa. Amb las transformacions e una penalitat de Scòtt Dureau, la marca èra de 20-0. Mas dins lo segond temps, Hull KR marquèt quatre ensags. Solament, lor tustaire al pè passèt una sola transformacion e la defensa catalana tenguèt lo còp per ganhar fin finala 20-18. Los Dracs demòran en Anglatèrra que divendres aniràn desfisar los Rinoceròsses de Leeds, la formacion venceira de la Super-Liga 2011 e de la Copa del Monde dels clubs, sus un tarrenc ont lo Dracs an per l’ora jamai ganhat.

 

En Elita, la dimenjada que ven veirà se debanar la darrièra jornada abans las fasas finalas: dissabte, Tolosa reçauprà Limós ; puèi dimenge, Pià jogarà a Montpelhièr, Vilanòva a Lescura d’Albigés e los Dragonets recebràn l’AS Carcassona en tèrra catalana.

 

 

Alan Roch