Bandièra01 1180x150: Comuna de Tolosa

Actualitats

Rugbi XIII :Sublimacion limosenca en Copa

Silvan Teixidó se pòt regaudir: Limós es en mièja-finala de la Copa
Silvan Teixidó se pòt regaudir: Limós es en mièja-finala de la Copa | FFR XIII
Dissabte, a Brutús, al cap de 2 minutas de jòc, lo pilar dels Dracs Julian Bosquet plaquèt a retardament lo mesclanha pianenc de Salfòrd: Teò Fages. Lo jove catalan, assucat, prenguèt la direccion de l’espital e lo pilar dels Dracs tornèt al vestiari que l’arbitre sortiguèt lo carton roge. Los Dracs se trapavan a 12, mas sarrèron la defensa e arrestèron pas de prene iniciativas en ataca. A la pausa, menavan 16-6.
 
A la represa, Ian Henderson, solet, al ras del tengut , puèi Olivièr Elimà al tèrme d’un moviment collectiu ajustavan dos ensags: 28-6. E caliá esperar la fin de la partida per veire los Dracs passar dos còps sus l’ala esquèrra per Millard e Anderson: 40-6.
 
Tomas Bòsc ensaquèt 6 transformacions sus 7. Los catalans se trapan sols amb los Gigants d’Huddersfield amb doas victòrias.
 
Mas, divendres,las causas se complican: aniràn desfisar los Lops de Warrington qu’an arrancat l’egalitat a Wigan: 17-17.
 
Pel compte de la Copa de França, la comuna de Tolosa refusèt, per arrestat municipal, que se joguèsse lo quart Tolosa-Lescura als Minimes en rason de l’estat del terren.
 
Logicament, lo possessor de la Copa, l’ASCarcassona, anèt ganhar cò de Vilafranca de Roèrgue (Elita 2): 52-4 e Avinhon l’emportèt a Realmont (Nacionala 1): 52-10.
 
A St-Estève, los Dragonets, amb la quasi-mitat de l’efectiu qu’a ja jogat en Super-Liga, recebián Limós. Logicament, los Catalans menavan a la pausa: 18-6. Los Limosencs tornèron a 18-16, mas Barthau rajustèt un ensag per portar l’avança catalana a 8 punts: 24-16.
 
Amb lor capitani Murcià a la manòbra, los roge e negre beneficièron de las marridas recepcions dels sang e aur per signar tres ensags e un tombat e l’emportar 29-24. La formacion audenca, qu’a mancat lo campionat, se revèla una formidabla formacion en Copa e sortís l’un dels favorits aprèp aver eliminat Lesinhan al torn precdent! Òsca!
 
Las mièja-finalas son previstas pels 9 e 10 de març, mas caldriá que Tolosa-Lescura se joguèsse en setmana!
 
Balharem tanben tres estelas als organizaires del repais d’abans-partida (pels afogats, pas pels jogaires!) de Vilafranca: galavard fregit e vos disi pas las lescas!), gratonada (una patanassa, un talhon de pòrc e gratèus de tiron), tarta de pomas e vin! Aquò veniá aprèp l’aligòt del còp passat e abans la pola farcida anonciada pel 24 pel derbi contra Albi!
 
En juniors, lo trofèu Luc-Nitard tornarà pas a Carcassona que, dissabte, los jaune e negre pleguèron en quarts fàcia a St-Estève-XIII Catalan: 18-14, al tèrme d’una partida sarrada.
 
Los autres mièg-finalistas son: Baó, Avinhon e Vilanòva d’Òlt.
 
En Elita, las quatre partidas de campionat son programadas dimenge 17: ASC-Lescura (16h), Pià-Lesinhan (15h30), Limós-Vilanòva (15h) e Tolosa-Dragonets (15h). Un campionat que lo devenir èra al centre del rescontre entre los clubs e la Federacion dissabte passat a Perpinhan.
 
Lo projècte Dayan de super-campionat sembla remés a las calendas grècas que los clubs de fòbal, dins la situacion economica presenta, son pas dispausats d’investir dins un autre espòrt! Encara un sòmi fals que s’envòla? L’objectiu, realista, es de presentar l’an que ven un campionat amb 10 equipas en Elita. De seguir...

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

TO-Lescura se jogarà lo dimècres 20 de febrièr.

  • 0
  • 0

Escriu un comentari sus aqueste article