Bandièra01 1180x150: Comuna de Tolosa

Actualitats

Rugbi XIII: Pataquejadas fòrtas

| Gerard Barrau

Se sètz cardiacs, se crentatz los tifa-tafa tròp fòrts de vòstre còr, val mai per vos beure tisana de telh a l’ostal qu’anar seguir una partida de XIII sus l’estadi (o a la television). Atal, los rescontres de la dimenjada portèron lor fais d’emocion, de dramaturgia, de logica o de revirament imprevist.


Dissabte, al dintrar sus la pelena, los Dracs se presentèron sens l’arrièr Web e lo segonda linha Anderson, nafrats al darrièr moment. La formacion remaniada metèt mièja-ora a se trapar e los Gat-Fèrs de Wakefield ne profitèron per plantar tres ensags e menar 16-0. Los sang e aur ramosèron lor fòrça e lor nhac e marquèron dos còps abans la pausa (per Matiàs Pala e Grèg Monis): 16-12 pels vesitaires. A la represa, Damien Blanch permetiá als Dracs d’egalizar. Dupòrt marquèt tanben, mas l’arbitratge videò refusèt sa realizacion. Sus la bala seguenta, los Angleses traversèron lo tarrenc per marcar (22-16). A la 73a, Damain Blanch capitèt de puntar al canton del canton, pegat al drapelet de tòca. Tomàs Bòsc transformèt per l’egalitat, puèi ajustèt un tombat e, a la còrna, Baitièri confirmèt la victòria catalana: 29-22!
 
Los Dracs se trapan tresens al classament a un punt dels cap-de-fila, los Gigants d’Hudderfield qu’an pas fait als acusas a mièja per lor primièra desfaita de la sason: 43-18 encaissats a domicili fàcia a Bradfòrd.
 
Divendres, los Dracs aniràn desfisar los segonds, los Combatents de Wigan. Scòtt Dureau, lo menaire de jòc, es de retorn a Perpinhan: perseguís sa convalescéncia aprèp son operacion de l’uèlh e cap de data balhada per l’ora per sa represa sul terren.
 
En Elit, s’Avinhon ganhèt aisidament fàcia a Lescura 42-18, calguèt esperar la 78a minuta a Tolosa per qu’una penalitat de Gressèque balhe la victòria a Pià: 20-18.
 
Dimenge, a Limós, los locals e los Dragonets se lancèron dins una corsa perseguida coma doas bandas carnavalèscas que virarián sens pausa jos las Arcadas. Fin finala, a la darrièra minuta, Scott Blanch puntèt l’ensag que Fil Ramage transformèt per balhar la victòria als Occitans: 28-26.
 
A Carcassona, èra l’ora del revenge de la partida anar pel derby contra los vesins de Lesinhan. La partida tenguèt totas sas promessas dins l’intensitat de la luta e de l’engatjament, amb unas defensas plan ermeticas. Atal, a la pausa, Carcassona menava solament 6-0 (ensag d’Offerdhal e transformacion per Alberola). A la represa, Alberola ajustèt los dos punts d’una penalitat mas Lesinhan marquèt per Michau e Benausse transformèt, puèi ensaquèt doas penalitats: Lesinhan èra davant 10-8. Carcassona aviá mancat una cordelada d’escasenças e las contra-atacas verdas e blancas se fasián de mai en mai dangeriosas, mas Troy Savage (òme de la partida) s’arranquèt de las àrpias dels Singlars (??!). Alberola ajustèt la transformacion (71a), puèi mandèt un tombat entre los pals (77a) e, per faire bona mesura, Gregòri Mazard (que portèt las colors del FCL) confirmèt la victòria locala sus la còrna: 21-10.
 
Se Pià serà pas ratrapat per la primièra plaça del classament, la segonda plaça (e doncas la qualificacion dirècta per las mièja-finalas) demòra en jòc entre Carcassona, Dragonets e Lesinhan dins las tres darrièras jornadas.
 
Per la dimenjada novèla, plaça a la Copa amb las mièja-finalas: un somptuós Carcassona-Limós aqueste dissabte 9 a 4 oras del vèspre al Molin de Lesinhan, puèi Avinhon-Tolosa dimenge a Perpinhan (Brutús, 4 oras del vèspre).
 
Per èsser complet dins aqueste panoràma tretzista, cal ajustar la demonstracion de primièra de 13-fautuèlh que se debanèt dissabte de vèspre sala del Dòme a Carcassona amb, en particulièr, l’afrontament entre los Diables de Caors e los Dracs. Aquò daissa esperar sus las capacitats del XIII de França-fautuèlh per la Copa del Monde de julhet.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
3.

Seguida del fulheton :
En rason de las pluèjas sus Rosselhon, la mièja-finala Avinhon-Tolosa se jogarà dimenge de vèspre a Albi (estadi Mazicou).

  • 0
  • 0
Alan Roch Carcassona
2.

La partida Tolosa-Avinhon se jogarà, fin finala, a St-Estève (dimenge, 4 oras del vèspre).

  • 0
  • 0
Ives
1.

Quina polida bandièra blanc-blanc-roge sul cartèl qu'anóncia la partida ! Òc-ben, es una mièja finala de Copa de França de rugbí a XIII, mas bon ... E cantaràn la Marselhesa abans de jogar ?

  • 3
  • 1

Escriu un comentari sus aqueste article