Bandièra01 1180x150: Comuna de Tolosa

Actualitats

Rugbi XIII. Copa: còp de pal tragic per Limós

L’Équipe-Magazine fa la Una de son numèro d’aqueste dissabte 11 de mai sus la dissolucion de la Liga de rugbi de XIII pel regime de Vichei e consacra a las relacions XIII-XV un dossièr d’un dotzenat de paginas
L’Équipe-Magazine fa la Una de son numèro d’aqueste dissabte 11 de mai sus la dissolucion de la Liga de rugbi de XIII pel regime de Vichei e consacra a las relacions XIII-XV un dossièr d’un dotzenat de paginas
Aquesta setmana e aquesta dimenjada, èran dedicadas mai que mai a las Copas. Atal, dimècres 8 de mai, sus la pelena sintetica –valent-a-dire sens pelena!– de Sant-Ruf, en Avinhon, los minimes de Sant-Estève fàcia al Tolosa Olimpic e los cadets de l’Ostal dels Joves de Carcassona fàcia a Albi (33-26) emportèron las Copas de França de lor categoria.
 
Dissabte de matin, los tretzistas agèron una brava suspresa jornalistica amb un dossièr de 12 paginas sus l’afar de Vichei e las relacions XIII-XV dins L’Equipe-magazine e un article suls Dracs dins lo suplement Espòrt de Le Monde: de temps en temps, la finèstra mediatica s’entredobrís!
 
Dissabte de vèspre, sus l’estadi Domèc de Carcassona, la vesprada se dobriguèt per la finala de la Copa Nitard. Los juniòrs d’Avinhon prenguèron los davants per menar 20-0 a la pausa. Mas dins lo segond temps la maquina infernala e iper-realista catalana dels Dragonets se metèt en rota per ganhar sus la marca de 30 a 24 e signar lo doblat Campionat-Copa!
 
Arribèt l’ora de la finala de la Copa Lord Derby entre Limós e Avinhon, disputada jols rebats del solelh sul trofèu de la Copa del Monde! Los 7000 espectators agèron dreit a una partida fòla, ont lo jòc prenguèt lo pas sus las consideracions tecnicas e tacticas, ont calguèt saupre expleitar las decas e aproximacions de l’adversari, ont accions de tria e cambiaments de situacion frairejèron amb decas nivèl escòla de rugbi…. Atal, tretze ensags foguèron marcats: plaça doncas encara mai a l’ofensiva! A la pausa, Limós menava 14-12. Menèt puèi 21-12 abans de se faire passar 22-21 per Avinhon, aver un novèl moment fòrt per tornar prene la marca: 33-22. Mas Avinhon profitèt de l’indisciplina limosenca per tornar faire son retard e reprenguèt l’avantage 38-33 amb un tresen ensag de son talonaire Nasso, elegit òme de la partida (qualificat Papa novèl d’Avinhon sul site de la Federacion)! A doas minutas de la fin, Blanch marcava un novèl ensag pels Roge e negre. Ramage prenguèt la pauma per temptar la transformacion decisiva. Aviá ensacat las cinc primièras: dos còps amb l’ajuda del pal qu’aviá causit de daissar dintrar la pauma alara que lo pal empachèt una conversion provençala. L’estadi tot retenguèt son buf. E la pauma de Ramage s’envolèt, montèt e… toquèt tornar lo pal… , puèi sortiguèt! 38-37: la Copa podiá prene lo camin de Provença aprèp cinc annadas passadas en tèrra d’Aude: un an a Limós, dos a Carcassona e dos a Lesinhan. Una victòria que marca lo reviscòl bèl de la formacion avinhonesa e sa pujada en poissença. Un òme-camèra de BeinSport seguiguèt tota la jornada carcassonesa, dempuèi lo torneg dels joves Ostric de matin, fins a la remesa de la Copa per un subjècte de passar dins lo magazine Rugby-Pack d’aqueste dijòus a 20h30 sus la cadena esportiva.
 
La dimenjada èra tanben consacrada a la Cup amb los 1/8 de finala. Una brava suspresa: l’eliminacion de Leeds a Huddersfield: 24-8. Se qualifiquèron pels quarts previstes per la dimenjada del 14 de julh: London Broncos (25-16, fàcia Badfòrd), HullFC (24-6, fàcia a Wakefield), Warrington (52-6, fàcia a Salfòrd), Wigan (venceire cò de HullKR: 46-14), Widnes (que ganha 36-0 cò de Workington, los tombeires de l’ASCarcassona). Sheffield representarà las formacions de Championship mercé a sa victòria sus Halifax: 28-12.
 
Enfins, passejada de santat pels Dracs que passan un 92-8 en marcant 16 ensags a York: Larroyer, designat òme de la partida, ne marca 4 e Escarré 3.
 
Dissabte, a 3 oras del vèspre, los Dracs ensajaràn de tornar trapar lo camin de la victòria en Super-Liga amb la recepcion de Castleford, mercé als retorns anonciats de Millard, Menzies e Anderson entre autres.
 
Dimècres 8, a Ramonvila, se tenguèron las finalas de Nacionala 1 e 2: en Nacionala 1, lo titol de campion se concretizèt per Realmont venceire de La Reula (23-4) alara qu’en Nacionala 2 lo bloquièr prenguèt lo camin de Clairac aprèp sa victòria (24-14) fàcia a Ferrals de las Corbièras.
 
Una vesprada de finalas se tendrà dimenge a Esperasan amb lo bloquièr de promocion mes en jòc entre Val de Danha e Santa-Liurada e aquel de Nacionala 3 que deurà causir entre Sant-Laurenç de la Cabrerissa e l’Ententa Preissan-Lauquet.
 
A Pià, dimenge, es un autre derbi mas catalan aqueste còp que serà a l’aficha de la finala d’Eleit 2 entre Baó e Palau, una equipa de Palau que poiriá rejónher los rengs de l’Eleit 1 per la sason venenta. En dobertura, los juniòrs de Baó e aqueles de Tonens se disputaràn lo títol dels juniors nacionals.
 
Las finalas femininas seràn tanben al programa de Pentacosta a La Reula: entre Tolosa e Nantas per la segonda division e entre Factura e Pujòls en primièra division.
 
Tre dissabte 18, la finala de XIII-fautuèlh serà un novèl e prometeire afrontament entre los catalans a Caus dins la sala Lamartina de Marselha.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Las finalas previstas dimenge a Pià se debanaràn fin finala a Perpinhan (Brutús).

  • 2
  • 0

Escriu un comentari sus aqueste article