Bandièra01 1180x150: Comuna de Tolosa

Actualitats

Rugbi XIII: un punt que fa lo bonur dels Dracs

Aqueste dimenge, a Bradford, per aquela partida decisiva en vista de la qualificacion per las pelhòfas, Laurenç Fraissinós aviá mes al repaus l’arrièr Morgan Escarré, podiá pas comptar amb Scott Dureau nafrat ni amb Zeb Taia suspendut, mas fasiá dintrar, aprèp de mesadas d’interrupcion, l’arrièr Webb e lo pilar Olivièr Elimà e, de retorn de suspension, lo capitani Casty e Julian Bosquet. Lo paquet d’avants teniá atal fièra mina. Los Taures marcavan d’entrada, mas Marc Palà replicava. Los Dracs tombavan dins lors travèrses costumièrs: paumas tombadas (e dire qu’avián passada la setmana a se faire passas a l’entraïnament!), defensa a traucs. Bradford ne profeitava per ajustar dos ensags e menar largament a la pausa 18-4.
 
Tre la represa, Lopini Paea dobrissiá lo camin de l’ensag a Jamel Fakir. A l’ora de jòc, Brent Webb, en cambas per sa represa, se trapava al relai de Leon Pryce e acabava sa corsa darrèr la linha. Los Dracs tornavan atal a dos punts: 18-16. Mas los Taures profeitavan de las aproximacions catalanas per conforar lor avantage a la 70a minuta per un ensag d’Adrian Purtell: 22-16. Los catalans ensajavan de ratrapar lo retard e l’arrièr local retardava un tengut. L’arbitre li sortissiá lo cartonet color solelh. Color solelh pels catalans que, malgrat la sortida sus nafradaura a la cavilha del capitani Casty, profeitavan d’aquela superioritat numerica per marcar al pè dels pals per Ian Henderson (74a minuta); amb la transformacion, Tomàs Bòsc metiá las doas esquipas a egalitat e, a la 77a minuta, encapava lo tombat decisiu dins la mesura ont la darrièra temptativa de son adversari Sammut morissiá a la dreita dels pals. Victòria arrancada a l’energia doncas pels Dracs: 23-22 que sèrvan la seisena plaça amb dos punts d’avança sus Hull FC, venceire 38-20 de son vesin Hull KR. Bradford se trapa noven a sièis punts e serà pas (a priòri) en mesura de venir contestar la qualificacion catalana.
 
En cap de classament, los Gigants d’Huddersfield se confirman coma los menaires de la competicion aprèp una victòria 30-12, dins una partida supèrba, sul terren de Wigan, davant 20 000 espectators.
 
Wigan que serà l’adversari dels Dracs aqueste dissabte a 18 oras a Brutus. E los catalans esperaràn que lor adversari age ja lo cap a Wembley per la finala de la Cup del dissabte venent!
 
En NRL, los Roosters son en cap de classament aprèp la desfaita dels Lapinons-Rabbitohs fàcia a la Tempèsta-Storm de Melbourne 26-8. Benji Marshall, lo dobertura internacional neozelandés dels Tigres de Paramatta, ven d’anonciar son passatge a XV cò dels Auckland Blues, aprèp lo refús de signar a Tolon: aquò en vista d’integrar la formacion dels All Blacks per la Copa del Monde de 2015.
 
Al recampament del XIII de França, diluns passat a Brutus, pas de Thierry Dumaine que deviá èsser l’adjunt de Richard Agar. Aquel anonciava que preniá coma ajuda, en mai de l’Olivièr Guisset, son adjunt de Wakefield , l’ancian mièg de mesclanha australian James Webster.
 
Gausam creire que tot se passa dins lo melhor esperit e la serenitat per que los Blaus jòguen al maximum de lors capacitats las partidas de la Copa del Monde.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Lo resumit de la partida Bradfòrd-Dracs en imatges :
http://fr.catalansdragons.com/index.php?article=2013-08-12_2941

  • 1
  • 0

Escriu un comentari sus aqueste article