Bandièra01 1180x150: Comuna de Tolosa

Actualitats

Rugbi XIII: aquò se complica

Dempuèi que los Dracs jògan en Superliga an pas jamai ganhat una sola partida sus l’estadi de Leeds. Divendres, en serada, las causas s’animèron a la vintena minuta amb un moment de tirapèlses entre Blanch e son vis-a-vis Ryan Bailey. Los angleses profeitèron de la preséncia sul banc de Blanch per marcar un ensag per Ryan Hall e Sinfield rajustèt la transformacion e una penalitat: 8-0 a la pausa. Coma tròp sovent, los catalans avián dominat mas sens marcar amb Scott Dureau a la mesclanha e Tomàs Bòsc a una ala. A la represa, Scott Dureau lançava Lopini Paea que puntava l’ensag. A l’ora de jòc, Elliott Whitehead preniá al tampon la pauma a un anglés e sul tengut seguent Olivier Elima marcava. Amb las doas transformacions de Bòsc, los catalans menavan 12-8. Aquò durèt fins a la 73a minuta. Los Dracs podián pas mai faire virar en rason de nafraduras e acabèron per plegar: Mitch Archuch marcava l’ensag e Sinfield transformava; Leeds menava 14-12 per l’emportar fin finala 20-12 aprèp un tresen ensag marcat a la còrna per  MacGuirre.
 
Coma Saint Helens a perdut fàcia a Warrington 16-29 e que Hull FC ganhèt la batèsta dels tombats 2-1 a Wigan en fin de partida per l’emportar 34-33, abans la darrièra jornada avèm:
 
5. St Helens, 29 punts (+116)
6. Hull FC, 28 punts (+ 115)
7. Dracs, 28 punts (+17)
8. Hull KR 26 punts (-106).
 
Per la darrièra jornada, St Helens reçauprà Hull FC. Hull KR, que deuriá ganhar sens problèma fàcia als London Broncos, s’es condemnat a la ueitena plaça amb sa desfacha del costat de Widenes 36-22.
 
Per poder jogar la primièra partida de las pelhòfas a domicili, cal acabar 5n o 6n: alara, demòra pas qu’una sola solucion als sang e aur dissabte a 6 oras del vèspre a Brutus: batre Warrington, una esquipa assegurada de la segonda plaça.
 
Los Lops pòdon pas rejónher Huddersfield en cap de classament, Wigan e Leeds prendràn (mas dins cun òrdre?) la tresena e la quatrena plaças. L’esquipa de Londres es al pus mal financièrament e amb un public estequit e se considèra son remplaçament per Featherstone per la sason venenta.
 
Lo XIII capita pas a s’impausar e a viure plan dins la capitala anglesa. Al plan europèu, sèm a l’ora de l’espandiment amb la reconeissença per las autoritats grègas de la federacion tretzista del país; e los contactes de l’FFR XIII amb lo govèrn d’Andòrra per desvolopar lo XIII al Principat.
 
Aquesta dimenjada, per renfortir la coesion del grop, los jogaires de l’AS Carcassona XIII, qu’an batut dissabte Palau en amical 34-12, seràn en estagi comando amb lo 3n RPIMA. D’aquel temps, aqueste dissabte 7, Tolosa, Tolosa-Broncos Limós, Lesinhan disputaràn lo Torneg Georges Aillères dins la ciutat mondina.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Cacassona
1.

De notar que los Dracs preveson animacions sul tèma de la catalanitat pel rescontre de dissabte.
Sempre endavant !

  • 2
  • 0

Escriu un comentari sus aqueste article