Bandièra01 1180x150: Comuna de Tolosa

Actualitats

Un Monde XIII: istòrias de familha

Los fraires Kane e Andrew Bentley jògan al Tolosa Olimpic
Los fraires Kane e Andrew Bentley jògan al Tolosa Olimpic
Aqueste divendres, una partida al programa qu’interèssa França: l’oposicion entre la Nòva Zelanda e Papoa-Nòva Guinèa a Leeds. Los Kiwis an anonciat que Sonny Bill Williams seriá aqueste còp sus la pelena per menar en infèrn los Aucèls de Paradís!  La darrièra partida de la pola B es programada aqueste diluns a Brutus (Perpinhan) amb l’oposicion França-Samoa.
 
Es qu’Andrew e Kane Bentley seràn de la partida? La responsa aperten a l’entraïnaire Richard Agar. Los fraires Bentley son en païses coneguts amb la Nòva Zelanda e Samoa. Fasián part de l’esquipa de França que rescontrèt divendres passat los neozelandeses. Los dos, que pòrtan ara lo malhòt del Tolosa Olimpic,  nasquèron a Auckland. Lor paire, originari de Samoa, portèt lo malhòt nacional samoan a la fin de las annadas 80 e debuta de las annadas 90.  Venguèt en Euròpa (a Oldham en primièr, puèi a La Reula).  La sòrre, Jayne-Marie, es capitània de l’esquipa de França femenina de XIII. Bon, lo mai pichon, Hamish, jòga per l’ora amb los cabdèths de l’SU Agenés!
 
Costat Anglatèrra, se Sam Tomkins es demorat fisèl al XIII e ocupa lo pòst d’arrièr de l’esquipa de la Ròsa, son fraire Joel èra al centre de l’ataca dissabte passat del XV anglés fàcia a Austràlia!
 
Dins aquela esquipa, jogava a la dobertura l’Owen Farrel, filh d’Andy Farrel que foguèt lo mai jove capitani de l’esquipa de Grand Bretanha de XIII e que joguèt a Wigan de 1991 a 2004 abans de passar a XV (Saracens) e de jogar la Copa del Monde 2007 de XV amb Anglatèrra. Son filh lo seguiguèt dins aquesta migracion.
 
Lo XIII d’Anglatèrra presenta dins sa composicion los 3 fraires Burgess: George (21 ans, 1,84m, 120 kg),  son besson Tomas (1,96m, 116 kg) e  Sam (24 ans, 1,96m, 116 kg); manca que l’ainat Luke! Los quatre jògan al South Sydney Rabbitohs.
 
L’arrièr del Rabbitohs, Anthony Minichiello, se soven de son papeta italian amb son fraire, lo segonda linha Marc.
 
Dins l’esquipa fijiana, son seleccionats los 3 fraires Sims: Tariq, Ashton e Corbin, los 3 son jogaires d’NRL. Lo centre dels Dracs Darryl Millard pòt comptar amb las passas de son fraire a la dobertura: Ryan, que jogava a Avinhon l’an passat. Los fraires Naykama (Wess e Kevin) fan tanben part d’aquela seleccion.
 
Austràlia alinha los bessons Josh e Brett Morris; Galas presenta dos autres bessons: Ben e Rhys Evans.
 
Los Henderson son dos per Escòcia, dos que pòdon jogar talonaire: Ian, que jòga als Dracs catalans e son fraire, Andrew (Sheffield). Manca l’ainat Kevin que joguèt amb eles la Copa del Monde de 2008, mas qu’a arrestat sa carrièra e qu’es ara carbonièr en Queensland. Mas, sul terrenc, Ian altèrna amb Ben Fisher que foguèt son predecessor cò dels Dracs!
 
Dins aquela esquipa d’Escòcia, jògan tanben los fraires Sam e Josh Barlow e tanben los fraires Philips, Brett e Callum, qu’eles èran pas brica despaïsats dins la partidas disputadas a Workington, vist que defendon las colors de l’esquipa locala.
 
Los fraires Grix, Simon (Warrington) e Scott (Huddersfield), defendon las colors d’Irlanda.
 
Dins l’esquipa de Tònga, se trapa Mickey Paea que crosa dins las partidas de Superliga son fraire Lopini, jogaire als Dracs catalans, non retengut en causa d’una nafradura.
 
Jol malhòt dels Tomahawks americans, se trapan los fraires Paulo: lo dobertura Joseph e lo pilar Junior.
 
Lo XIII es atal un afar de familha. De tot biais, los tretzistas son una granda familha!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Escòcia bat Estats-Units 22-8 (0-8 a la pausa)

Partida Italia-Tonga decisiva per la qualificacion pels quarts :
- Italia ganha : Italia enq uarts
- egalitat o victòria de Tonga : Escòcia qualificada.

  • 3
  • 0

Escriu un comentari sus aqueste article