Bandièra01 1180x150: Comuna de Tolosa

Actualitats

Rugbi XIII: ont anarà la Copa, a Carcassona o a Tolosa?

Demòra una setmaneta a Joan-Francés Albèrt, director de la Calandreta de Ciutat e coentraïnaire de l’AS Carcassona XIII, per trapar las solucions e contrastar Tolosa
Demòra una setmaneta a Joan-Francés Albèrt, director de la Calandreta de Ciutat e coentraïnaire de l’AS Carcassona XIII, per trapar las solucions e contrastar Tolosa | Mirelha Braç
Divendres, los Dracs recebián a Brutus los London Broncos pel compte dels 1/16s de la Cup. Los catalans prenián lèu-lèu la mesura de l’adversari amb un ensag de Leon Pryce que mandava puèi en Tèrra Promesa sus doas traucadas Anderson e Bòsc. Mas Somomona sautava mai naut qu’Escaré per puntar l’ensag anglés: 16-6 a la pausa. Al retorn dels vestiaris, los Dracs tuavan la partida amb tres ensages signats Millard, Maria e Anderson. Los Dracs se daissavan viure un pauqueton, los angleses marcavan dos còps, Escaré replicava mas la darrièra realizacion èra anglesa amb Slyney sus la còrna. Victòria 40-24 pels Dracs ont Duport (tocat a l’espatla al França-Anglatèrra de la Copa del Monde en novembre) fasiá sa reaparicion. Calguèt lo punt d’aur per balhar la victòria 37-36 als Diables de Salford suls finalistas 2013 d’Hull FC.
 
L’autra esquipa d’Hull, los KR, a perdut sus sa pelena 28-24 fàcia als Lops de Warrington. Leeds a ganhat sens cap de dificultat a Wakefield: 60-6 e un sol punt 17-16 a fait lo bonur de Saint Helens a Huddersfield.
 
Al torn venent (darrièra dimenjada d’abril), los Dracs aniràn desfisar los Taures de Bradford, un grop ont ven de signar lor ancian coesquipièr Jamal Fakir. Serà l’un dels caps d’aficha de la competicion amb las oposicions Leeds-Saint Helens e Salford-Widnes.
 
Es aquesta formacion de Widnes que serà aqueste dissabte 12 (15h30) a Brutus ont los Dracs deuràn confirmar lor reviscòl en se metent pel cap que los Vikings son mai fòrts que l’an passat e ocupan actualament la quatrena plaça.
 
En campionat, èra lo primièr torn dels barratges que coneguèt unes resultats logics. Carcassona ganhèt contra los catalans de Palau 52-26 dins una partida a unes moments un pauc tròp musclada. Vilanuèva demorèt mèstra sus sa pelena fàcia a Avinhon: 29-18.
 
Per la dimenjada de Pascas, Carcassona anirà desfisar los Dragonets e Vilanuèva rescontrarà Limós a L’Agulha. Aqueste dimenge 13, a Carcassona, se tendrà la finala de la Copa Nitard dels juniors entre Tolosa e Limós (13h30), puèi la finala de la Copa Lord Derby entre lo Tolosa Olimpic e l’AS Carcassona (15h30). De notar, que per l’ora, jamai Carcassona ganhèt una finala de Copa jogada a domicili mas que Tolosa, 6 còps finalista, a jamai marcat son nom dins la lista dels venceires. A la vista de las resultas de la sason, lo Tolosa Olimpic partís amb los avantatges dels pronostics, mas Carcassona monta en poissança... Es doncas una finala supèrba que s’anóncia!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Lo rescontre Dragonets-ASC se jogarà lo diluns 21 d'abril a Brutús (15h), en dobertura de Dracs HullKR.
Una brava vesprada rugbistica !!!!
Amb una pascada ovala !

  • 21
  • 0

Escriu un comentari sus aqueste article