Bandièra01 1180x150: Comuna de Tolosa

Actualitats

Rugbi XIII: e los Sants descobriguèron l’Infèrn…

80 ans de rugbi catalan se festejaràn a Perpinhan aqueste dissabte 21 de junh
80 ans de rugbi catalan se festejaràn a Perpinhan aqueste dissabte 21 de junh
Pòt arribar que los Sants daissen lo Paradís per anar faire una virada en Infèrn! E pels 17 de Saint Helens, aquel infèrn pòrta un nom dempuèi aqueste dissabte 14 de junh: se ditz Gilbert-Brutus. Los caps de fila de la Superliga i venguèron per una partida decretada “jorn de la catalanitat”, senyeres distribuidas al public, interpretacion d’Els Segadors pels mainatges de La Bressola (en suplement de l’Albèrt Bueno), correfòcs del Riberal, Drac de carton, Gigants de Jaume d’Aragon e d’Esclarmonda de Fois... Los Sang e Aur an (enfins) voidada l’infirmariá: lo talonaire Ian Henderson èra de retorn; lo novèl vengut Sam Williams daissat sus la tòca per se remetre de son viatge. Dins lo primièr temps, la partida plan nharruda metèt en evidéncia las defensas mas sus doas passas al pè, Duport e Oldfield marcavan pels catalans que menavan 8-0 a la pausa.
 
A la represa, los angleses jogavan contra lo vent e lo solelh dins los uèlhs. Per arrengar lo tot, a l’ora de jòc, perdèron l’arrièr Lomax lo ginolh en desbarruta a causa d’un cambiament de pè! Amb una candelassa de Leon Pryce, la defensa anglesa se trauquèt e Duport anèt darrièr la linha. Henderson i marquèt son ensag personal en zigazaguejant dins la defensa advèrsa per puntar just sus la linha. Puèi, los Dracs contunhèron d’atacar e prepausèron un movement d’antologia: Pelissièr crosava amb Pomeroy que trapava Bòsc a nautor. Lo catalan despassa amb aquel ensag los 1000 punts marcats pel compte dels Dracs en Superliga. E lo festenal èra pas acabat: Duport passava los braces, Escarré perseguissiá l’accion, transmetiá a Bòsc que, d’una passa longaruda, escartava Oldfield per un novèl ensag. Puèi, Millard recuperava una pauma perduda pels angleses que vegèron passar un laucet e que lo tornèron trapar darrèr la linha 60 mètres mai luènh. Los angleses, malcorats, se daissavan anar a la dobertura de la saca de carpans e l’arbitre soritissiá lo carton jaune per l’avant anglés Alex Walmsley e per Pelissièr. Dins la darrièra minuta, Escarré tustava a seguir e Oldfield recuperava la pauma per concretizar un còp del capèl. Lo planchòt marcava: 42-0. Los catalans se lancèron dins un torn d’onor, saludats per lor public mas tanben pels sostens nombroses de Saint Helens, que multipliquèron las chifras d’afars dels cafès de Perpinhan aqueste dissabte. Amb aquela victòria de tria, seguida per 10 000 espectators, los Dracs remontan a la setena plaça del classament e veson lor diferéncia de punts virar al positiu (+2).
 
Saint Helens garda lo cap de la competicion que los Gigants d’Huddersfield anèron ganhar 24-22 cò de Leeds una partida indecisa fins a la darrièra segonda e la darrièra decision de l’arbitratge vidèo. Dissabte, a Brutus (18h), vendrà als Dracs de contunhar dins la lançada fàcia a Hull FC que ven de ganhar 56-6 a Widnes.
 
Dissabte, serà la fèsta de la musica: alara, venètz nombroses a Brutus: los cants e crits del public, los trucs dels caramèls, lo buf de la tramontana... Aquò òc, es de musica!
 
Dissabte tanben, lo XIII Catalan festejarà sas 80 annadas d’existéncia amb una brava taulejada e divèrsas animacions. Unas bravas paginas d’istòria, mas los Dracs preparan ja deman amb la mesa en plaça de l’esquipa de Juniors Academy: mai de 80 joves de 16 a 19 ans an pres part a la vesprada de deteccion del dimècres 11 de junh e un trentenat integraràn la formacion novèla a la dintrada.
 
E los tretzistas seguiràn de prèp aqueste dimècres 18 la segonda partida dels Estats d’Origina (retransmission a miègjorn en dirècte sus BeIn Sport).
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

La fèsta del XIII Catalan :
http://www.catalansdragons.com/articles-9/91-2854-le-programme-des-festivites/

  • 3
  • 0

Escriu un comentari sus aqueste article