Bandièra01 1180x150: Comuna de Tolosa

Actualitats

Nais A Vòste, un nòu sit d’informacions en occitan

Es nascut uèi un nòu sit d’informacions en occitan. Li dison A Vòste e nais amb la volontat d’ofrir de nòvas en gascon, pr’amor que la còla d’aquel nòu projècte considèra “que lo gascon a d’estar present en tots los parçans e que’u cau favorizar”. A Vòste es dirigit pel jornalista catalan Jordi Colomer e se tracta d’un jornal dobèrt que i participan benevòlament de “parlants e neoparlants” del gascon. La revision lingüistica es presa en carga per l’òme de letras bearnés Eric Gonzales que tanben es collaborador de Jornalet.
 
A Vòste publicarà mai que mai de nòvas curiosas, qu’atiren l’atencion del mond dins los rets socials, amb la tòca d’“apressar la lectura en gascon cada dia au maximum de personas possible, mei que mei joens”.
 
“Que hèm un web en gascon entà potenciar aquera varianta de l’occitan”, çò a dich Colomer a Jornalet, en tot soslinhar que “non i a pas cap de volontat de secessionisme lingüistic”. Segon lo director del nòu mèdia, “que i a ua mancança hèra grana de sits web en occitan suu ret, mes dens lo cas deu gascon gaireben poirem parlar de desèrt. E que hè dòu pr’amor que lo gascon a ua hòrta personalitat”.
 
A Vòste es bastit solament amb l’enveja de far quicòm e amb “l’amor d’ua lenga”, e la còla fa una crida per encoratjar lo mond a i escriure.
 
Dempuèi l’espelida sul ret dels grands mèdias occitans coma La Setmana e Aquò d’Aquí, e en seguissent la dralha marcada pel Forum Occitània, Nòvas d’Occitània e sustot per La Porta d’Òc, los sits d’informacions en occitan son de mai en mai nombroses e nos en congostam. Esperam qu’A Vòste capite plan e que poscam bastir d’acòrdis de collaboracion. 

Legissetz-lo sus avoste.com.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pau
4.

*potenciar: reforçar, enfortir (anglicisme del spanglish e del catanyol)

  • 1
  • 1
Andrieu
3.

Que i a tostemps maishantas lengas !
"l'òme de letras bearnés Eric Gonzales"
g-o-n-z-a-l-e-s : ueit letras… Ne i a qui n'an mei…

  • 7
  • 3
Pirolet
2.

Òsca a "A vòste"!

  • 8
  • 5
Alex Hontarreda Baiona
1.

Quina lenga mei beròia que la de "A vòste"! Aquerò que càmbia. Acerà nada esquipa, nat menièr e nat rangièr tà ns' escarraunhar las aurelhas. Quant au hons…que hè arríder. Aquerò que càmbia tanben.

  • 6
  • 16

Escriu un comentari sus aqueste article