Bandièra01 1180x150: Comuna de Tolosa

Actualitats

Los Estats Units sostendrián l’Estat Islamic segon un economista canadenc

| Global Research
Michel Chossudovsky, professor emerit d’economia de l’Universitat d’Ottawa (Canadà), a publicat sul sit de Global Research un article ont explica en 26 concèptes que l’Estat Islamic es l’aliat dels Estats Units, e que la guèrra estatsunidenca “contra lo terrorisme” es un sosten a l’islamisme radical. Lo professor pren aquela conclusion après analisar qualques centenats de documents.
 
L’analisi de Chossudovsky se presenta amb los 26 ponches seguents:
 
— Al Qaida e las organizacions restacadas recebèron lo sosten dels Estats Units dins los ans 1980 quand luchèron en Afganistan contra l’armada sovietica.
 
— Entre 1982 e 1992 lo jihad afgan recrutèt 35 000 jihadistas de 43 païses desparièrs. Segon Chossudovsky, s’entraïnavan dins un camp de la CIA en Paquistan, e los anoncis que publicavan los mèdias per engatjar los jihadistas foguèron pagats pel país nòrd-american.
 
— Lo professor assegura que l’universitat de Nebraska publiquèt de libres de jihadistas per los difondre dins las escòlas d’Afganistan.
 
— Usama Bin Ladin, lo terrorista numèro un pels Estats Units, lo recrutèt la CIA en 1979. Bin Ladin acabèt son entraïnament a 22 ans dins un camp de la CIA.
 
— Ronald Reagan parlèt dels talibans coma de “luchaires per la libertat” e provesiguèt d’armas los islamistas que luchavan contra l’Union Sovietica. Lo govèrn secular d’Afganistan tombèt en mans dels talibans.
 
— L’Estat Islamic èra al començament una filiala d’Al Qaida, creada pels servicis d’intelligéncia estatsunidencs, britanics, israelians, paquistaneses e sauditas.
 
— L’Estat Islamic participèt amb los Estats Units e l’OTAN a la guèrra civila de Siria contra lo govèrn de Bashshar Al Asad.
 
— L’OTAN e de nauts foncionaris turcs se serián mainats del recrutament dels joves jihadistas de l’Estat Islamic en 2011, segon aquel article. Tanben aurián recrutat de mond per Al Nusra, un grop radicial sirian.
 
— L’articulista assegura que dins los rengs de l’Estat Islamic i a una representacion dels servicis d’intelligéncia occidentals, mai que mai britanics.
 
— Segon una informacion de CNN del 9 de decembre de 2012, un naut foncionari estatsunidenc e qualques diplomas admetèron que “los Estats Units e qualques aliats europèus entraïnèron per mejan d’especialistas los rebèls sirians contra las armas quimicas”.
 
— Las practicas de las decapitacions que fa l’Estat Islamic fan partida dels programas d’entraïnament dels jihadistas en Arabia Saudita e Qatar.
 
— L’Arabia Saudita auriá mes en libertat de milièrs de presonièrs de sas presons a condicion que s’engatgèsson amb l’Estat Islamic per luchar contra Al Asad en Siria.
 
— Israèl auriá sostengut las brigadas de l’Estat Islamic e d’Al Nusra dins lo Replanat de Golan, un territòri que se disputan Israèl e Siria. En febrièr passat, lo primièr ministre israelian, Benjamin Netanyahu, vesitèt un espital a la frontièra amb Siria e toquèt la man d’un rebèl sirian ferit.
 
— Chossudovsky afirma que l’Estat Islamic servís los interèsses de l’Occident perque causa la destruccion e lo caos politic e economic en Siria e Iraq.
 
— Lo senator estatsunidenc John McCain se seriá reünit fa gaire amb de caps jihadistas, qu’entre eles i aviá de militants de l’Estat Islamic en Siria.
 
— L’Estat Islamic resistís plan als bombardaments dels avions estatsunidencs. Per contra, segon lo professor canadenc, recep encara d’ajuda militara secreta dels Estats Units.
 
— Dins aquel sens, Chossudovsky afirma que los bombardaments dels Estats Units e de lors aliats van pas dirèctament contra l’Estat Islamic mas contra las infrastructuras economicas d’Iraq e Siria, compreses los sits petrolièrs.
 
— Lo partiment d’Iraq e Siria en tres territòris separats —una republica curda, un califat sunnita e una republica shiita— fariá partida del plan de l’intelligéncia estatsunidenca dins sa “guèrra contra lo terrorisme”.
 
— Aquela “guèrra contra lo terrorisme”, iniciada en 2001 amb lo sosten de qualques païses de l’OTAN, se presenta com un “chòc de civilizacions”, mas lo professor afirma que visa solament d’objectius economics e estrategics.
 
— Los Estats Units aurián sostengut secretament divèrsas entitats restacadas amb Al Qaida dins l’Orient Mejan, l’Africa Subsahariana e Asia per crear de conflictes intèrnes e destabilizar de païses independents.
 
— Demest aqueles grops caldriá soslinhar Boko Haram en Nigèria, lo Grop de Combat Islamic de Libia o Jemaah Islamiya en Indonesia.
 
— Una d’aquelas organizacions seriá la qu’agís en Xinjiang, la region autonòma dels Oigors, dins l’estat chinés, que segon aquel article auriá tanben lo sosten estatsunidenc. Dins aquel sens China diguèt que la tòca d’aquelas organizacions “jihadistas” es d’establir “un califat islamic a l’oèst de China”.
 
— Es una paradòxa que, mentre que los Estats Units luchan contra l’islamisme radical, los jihadistas creisson.
 
— Chossudovsky afirma que la menaça terrorista es una creacion estatsunidenca promoguda tanben per d’autres govèrns occidentals e lors mèdias. E es aital qu’amb lo pretèxt de combatre lo terrorisme e protegir la populacion, se retalha de dreches socials e mai se viòla de libertats civilas, de dreches umans e la vida privada.
 
— La campanha antiterrorista contra Al Qaida e contra l’Estat Islamic a contribuit considerablament a la “demonizacion” dels musulmans, al racisme e a la pojada de l’ultradrecha. De mai en mai lo mond restacan las cruseltats dels jihadistas amb l’islam.
 
— Dins son darrièr ponch, Chossudovsky afirma que los que meton en question “la guèrra contra lo terrorisme” son declarats terroristas e someses a las nombrosas leis antiterroristas que los Estats Units an aprovadas dins los darrièrs dètz ans. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tàrrega Igualada (PP.CC.)
13.

Jo no entenia d'on treïa tot l'arsenal per fer la guerra de la manera que la fan, ara em sembla que ho tinc mès clar.
Ens han pres el pèl i ha mort molta gent, nomès pels interessos dels de sempre, canvien l'obra, però
els actors són els mateixos.
A veure si n'aprenem, i els tractem a tots pel que són en el fons, un grapat d'assessins, i monstres de la pitjor espècie.
Espero que algun dia el Món canvii, pel seu bé.

  • 1
  • 0
Cristian FORMENT AGEN
12.

#10- Mèfi: "... es que los denonciators an aquela puta de tissa de l"OMNICRITITICISME ".

  • 3
  • 1
Cristian FORMENT AGEN
11.

Non solament son OMNICRITITICISTAS, mes tanben POLEMISTAS DAMB LO DIABLE DESSÚS.

  • 2
  • 1
Cristian FORMENT AGEN
10.

#7- "Perqué acusar Jornalet de partisanisme ?"
Cercatz pas amic Lausa, es qu'an aquela puta de tissa de "l'OMNICRITITICISME"*

* Mot jos propietat intellectuala.

  • 3
  • 1
Pirolet
9.

Dire que los govèrns estatsunidencs an una responsabilitat granda dins lo desvolopament de l'islamisme es tras que verai. Son eles qu'armèron los religioses per far la guerra al comunisme. Son tròp piòts per se mainar del dangièr de las religions. Per eles, totas las sectas (coma la Scientologia) ne son. Es s'es plan vist que mandar als trastes vièlhs una ideologia politica es plan mai aisit que d'i botar una religion, qu'a l'eternitat per ela, lo fanatisme e comptan pas los mòrts puèi que se ganan lo paradís.

  • 3
  • 0

Escriu un comentari sus aqueste article