Bandièra01 1180x150: Comuna de Tolosa

Actualitats

Escandal als Estats Units per las torturas e las messòrgas de la CIA

Un rapòrt exaustiu del Senat demòstra que la CIA mentiguèt al Parlament e que practiquèt de torturas fòrça duras que serviguèron per pas res

Als Estats Units esperavan lo rapòrt que lo Senat elaborava dempuèi cinc ans sus las activitats de la CIA après aquel fatidic 11 de setembre. Foguèt publicat dimars passat e descadenèt un autentic escandal que poiriá aver de consequéncias de tota sòrta. Lo document demòstra que l’agéncia torturèt plan mai que çò qu’aviá reconegut e amb fòrça mai de duretat que çò qu’aviá jamai reconegut. E demòstra tanben que mentiguèt repetidament al Parlament estatsunidenc. Ça que la, la conclusion mai importanta de totas es que la tortura serviguèt per pas res en cap de cas.
 
La CIA aviá totjorn afirmat que la tortura èra estada utila per trobar las pistas qu’avián menat fin finala a Bin Ladin. Mas lo rapòrt o desmentís entièrament.
 
Las principalas conclusions de l’estudi (que se pòt legir en anglés aquí) son:
 
— que la CIA torturèt d’un biais fòrça mai brutal que çò qu’aviá explicat e o faguèt a fòrça mai de personas que çò qu’aviá dich;
 
— que i aguèt pas cap d’investigacion corrècta sus las activitats de la CIA, tocant la tortura dels detenguts;
 
— que la CIA exagerèt e enganèt lo Congrès e lo president sus las pistas obtengudas amb aquelas torturas, per poder contunhar de torturar;
 
— que los dirigents de la CIA foguèron totjorn durs e estrictes contra qualques unes de lors subordenats que metián en question l’eficacitat de l’informacion obtenguda mejançant las torturas;
 
— que s’amaguèt e se rebaissèt lo nombre de detenguts e de torturats;
 
— qu’almens 26 personas foguèron pas jamai detengudas ni subjèctas a de torturas e d’ans de preson;
 
— que la CIA manipulèt de jornalistas en lor mandant d’informacions falsas que metián en relèu la presumida eficacitat de las torturas.
 
Lo tèxt a mai de sièis mila paginas e es fruch d’una investigacion sens precedents de la part del Parlament estatsunidenc. De las sièis mila paginas, solament n’an fach public lo resumit, que ne fa aperaquí cinc cents. Fòrça acusacions que se fan ara oficialament sus las activitats de la CIA s’èran ja fachas per mejan d’informacions jornalisticas o d’ONG, mas ara l’impacte politic pòt èsser fòrça important. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernest Guevara Jr. L'Avana
4.

#2 Los prèmis nobèl son donats per d'amics de la governança financiarista (segon l'american way of peoples exploitation), alavètz, non se'n cal estomcar tròp.

  • 0
  • 0
Ernest Guevara Jr. L'Avana
3.

#1 La patz, es quand lo mai fòrt, lo venon pas mai far cagar…

Als crimis de la CIA, podèm ajustar totas las mòrts exepeditiva administradas o ajudadas logiticament dins los territòris sud americans per i remplaçar los movements progressistas de la fin del sègle XX per de republicas bananièras que defendiá, lo modèl autoritari ultraliberal qu'es a mand de se botar en plaça en Euròpa tota al mesprètz mai qu'evident de sas populacions…

  • 0
  • 0
Òlo Pujòlo
2.

E Barack Obama prèmi Nobel dera Patz! Moria!

  • 1
  • 2
Cristian FORMENT AGEN
1.

Snowden l'òmi de l'annada !

  • 5
  • 0

Escriu un comentari sus aqueste article