L’Institut d’Estudis Occitans ven de tirar a de milierats d’exemplars una brocadura de 32 paginas consacrada al lexic occitan dels rugbis qu’a vocacion d’èsser distribuida pels grands eveniments rugbistics. Atal, una distribucion se farà a Carcassona lo dissabte 24 de genièr a l’escasença del rescontre amical entre los Dracs catalans e los Chivalièrs Catars.
 
Coma me demandèron d’escriure la presentacion de la brocadura, vaquí çò qu’estipulèri:
 
 
“Lo rugbi e la fòrça de la paraula
 
Probable que tot comencèt del costat d’Esperasan quand un dinosaure desobrat lancèt un uòu a un collèga que passava apr’aquí. Aquesta primièra experiéncia foguèt una revirada, mas demorèt dins la memòria del país, jos la forma de la sola per exemple. E quand lo gèste fondador e iconoclasta de Webb William Ellis arribèt aicí, tot naturalament las tèrras d’Occitània, alargadas a las parts nòrd del Bascoat e de Catalonha, se transformèron còp sec en reialme d’Ovàlia. Coma tota religion, avèm la glèisa ortodòxa (la del XV) e la glèisa erètja (la del XIII). Al delà de las règlas del jòc e del debanament de las partidas, al delà dels jogaires, lo rugbi es portaire de paraulas (precisas o imatjadas), d’imaginari e de sociabilitat. Lo rugbi capita ben la fusion dels temps: lo passat («Te’n sovenes de...»), lo present (l’analisi de la partida en cors) e l’avenir (la projeccion sus las partidas seguentas). E la ròda vira, vira coma una pauma ovala dins lo cèl abans de rebombar d’un biais imprevisible que serà sorsa de novèlas istòrias, interpretacions, reescrituras... a l’entorn d’una bona cantina.”
 
Aprèp una presentacion de l’occitan, lo jòc es estudiat jos maites angles: la partida; los jogaires; l’entraïnaire; la pauma corrís; la defensa: còps de pè; la fièra dels trucs; nhòcas; per un punt; lo public.
 
En paginas centralas, traparetz la carta d’Occitània de las esquipas d’Elèit 1 e 2 de XIII coma de Tòp 14 e Prò D2 dels XV.
 
Lo librilhon s’acaba sul tèxte de las cançons emblematicas occitanas.
 
Anem, per començar l’An Nòu, trapatz plan de favas ovalas coma de paumas de rugbi dins las còcas dels Reis!
 
 
Dins l’ostal d’en fàcia
 
Sul sit del Comitat Occitan Sens Frontièra traparetz lo clip del cant de sosten a l’AS Besièrs sus un tèxte del Joanda, interpretat per Joanda el meteis, Joan-Breç Viétri, Danís Labat, Patrici Alonzo, Floreal Vaquerin amb la participacion dels jogaires blau e roge: Aquí es Besièrs!
 
 
Ragantar
 
En Elèit 1, partida decisiva aqueste dimenge 4 de genièr a Limós entre los locals e los Dragonets. En jòc: la quatrena plaça dins la pola bèla per la segonda fasa en companhiá de Carcassona, Tolosa e Lesinhan.
 
 
Los oitens de Copa
 
Los oitens de finala de la Copa Lord Derby se jogaràn lo dissabte 17 e lo dimenge 18 de genièr. Una sola partida entre esquipas d’Elèit 1: Tolosa-Palau.
 
Las esquipas de Nacionala 1 jogaràn de dèrbis: Clairac contra Vilanuèva e Vilagalhenc-Argon reçauprà Lesinhan.
 
Las autras esquipas d’Elèit 1 rendràn vesita a de formacions d’Elèit 2: Carpentràs-Avinhon, Vilafranca-Dragonets, Realmont-Limós, Albi-Carcassona. Un afrontament entre formacions d’Elèit 2 completa lo tablèu: L’Escura d’Albigés reçauprà Sent Gaudenç.
 
 
 
 
Alan Roch