Bandièra01 1180x150: Comuna de Tolosa

Actualitats

La BCE cromparà de deute public per valor de 60 miliards d’èuros per mes

Fins a setembre de 2016. L’injeccion totala en l’economia de l’Eurozòna superarà lo bilion d’èuros

La Banca Centrala Europèa (BCE) injectarà cada mes 60 miliards d’èuros dins l’economia de l’Eurozòna per evitar lo risc de deflacion e per promòure la recuperacion economica. O confirmèt xxxx passat en una conferéncia de premsa lo president de la BCE, Mario Draghi, qu’expliquèt que lo programa de crompa de deute public s’iniciariá en març e s’alongariá, almens, dusca a la fin de setembre de 2016, o fins que l’inflacion se poguèsse contrarotlar. Las crompas de deute public se faràn segon la contribucion de cada estat a la BCE e, en total, superaràn lo bilion d’èuros. La mesura, çò diguèt Draghi, deu contribuir a far circular los crèdits dins l’Eurozòna.
 
Draghi anoncièt la mesura dins una conferéncia de premsa a Francfòrt jos una granda expectacion. “Las crompas combinadas de valors dels sectors public e privat seràn de 60 miliards d’èuros. La tòca es que se fagan fins a la fin de setembre de 2016, e en tot cas se faràn fins que vejam que l’inflacion a un ajustament sostenable”, çò afirmèt. L’inflacion, segon lo mandat de la BCE, deuriá èsser de près del 2%, mas en decembre foguèt negativa pel primièr còp, del –0,2%.
 
Amb l’anóncia del programa de crompa de deute public, la BCE seguís l’exemple qu’inicièron ja, al començament de la crisi financièra, la Resèrva Federala estatsunidenca o la Banca d’Anglatèrra. De mai, la mesura n’acaba amb qualques meses d’especulacions dins los mercats, per saber se Draghi arribariá de despassar las reticéncias de qualques estats, mai que mai d’Alemanha, qu’a paur qu’amb aquel argent qualques païses dessarren lo ritme de reformas estructuralas. Mas l’opinion del procuraire general de la Cort Europèa de Justícia, favorable al programa de crompa de deute, e lo grand risc de deflacion dins l’Eurozòna, an sostengut fin finala los plans de Draghi qu’a decidit d’agir.
 
Mario Draghi expliquèt, pendent aquela conferéncia de premsa, que i auriá de limits en la crompa de deute. En concret, la BCE aquerirà pas mai del 33% del deute d’un determinat emissor. A explicat tanben que Francfòrt partejarà los risques d’un 20% de las crompas, çò que significa que l’80% restant serà de las bancas centralas de cada país.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Ciutat
3.

Lo que an de faire aquesta colha de la troica és tornar los diners dels bancs privats a sos respectius estats e qu' han estat assaltats per la banda de bandolers e quatrers de la troica. Perquè ja se pensen que lo poble no se'n recorda que es repartiren los diners públics entre sos amics los bancs privats, que paurets deien que no anaven ben, e deixaren los estats sense ni un centim. E ara resulta que se'n van a fer dinars a las Bermudes e de putes amb els nostres diners. Lo Rato del PP encara ha tengut la barra de faire unes targetes per treure diners de Bankia, un dels que va rebre diners publics, per treure diners sempre que volgués per el. Naturalment feren tot lo que los donà la gana sense haver consultat lo poble en cap moment. Mas quants diners ens han fotut per ciutadan 500,800,.. ?

  • 0
  • 0
Lutz
2.

«fin finala dempuèi sièis ans contunharàn de perdre 2% de revengut per an» >> Enfin qualqu'un que compren, a esquèrra, que l'inflacion es pas l'amiga dels paures ! Fa de ben !

Per çò qu'es de la decision de la BCE, aqueste argent es par las bancas, ne veirem pas jamai la color. Noirirà la bula que ven, es tot… Salat lo pop-corn per ieu se vos plai.

  • 1
  • 0
Ernèst Guevara Jr. L'Avana
1.

"L’inflacion, segon lo mandat de la BCE, deuriá èsser de près del 2%" ! Fa que los qu'an lo salari es estat augmentat plan mai fregelugament dempuèi 20 ans, puèi gelat fin finala dempuèi sièis ans contunharàn de perdre 2% de revengut per an ! Es tot çò qu'an trobat per nos salvar la pèl, aqueles arlandièrs ? Çò que nion sabon los autres es que metrestant, nos demandan de trabalhar sempre mai : trabalhar sempre mai per ganhar sempre mens : ont an vist que seriam d'acòrdi ? Ont an vist que seriam pro nèci o pro cèc per ne nos mainar pas ? Per ieu, l'afar es simple, del mens me pagan, del mens trabalhi… "esperadano la ultima ola" !

  • 7
  • 0

Escriu un comentari sus aqueste article