Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

L’estat francés oficializa la venda de l’aeropòrt de Tolosa a un grop privat chinés

| Mirza Junaid
Lo projècte èra ja plan avançat mas ara la nòva es publica. Per un arrèst del 15 d’abril, lo Ministèri francés de las Finanças e dels Comptes Publics fa oficiala la venda del 49,99 % de las parts del grop ATB (Aeropòrt Tolosa-Blanhac). L’estat, que possedissiá lo 60% de las parts, ne servarà pas que lo 10,01%. Lo crompaire es un consòrci privat chinés compausat de doas societats: Shandong Hi-Speed Group e Friedmann Pacific Asset Management. Lo prètz es estat fixat a 308 milions d’èuros (a títol de comparason lo budget annual de la comuna de Tolosa es de 630 milions d’èuros).
 
Dins lo Jornal Oficial del 15 de març, ja s’èra aprovada aquesta venda dins un arrèst de Ségolène Royal, la ministra de l’ecologia e del devolopament sostenable. Es una posicion curiosa venent del ministèri supausat defendre l’environament quand se sap que lo consòrci chinés prevei un retorn sus investiment rapid en far créisser la frequentacion de l’aeropòrt per lo far passar de 7,5 milions de viatjaires en 2014 a 18 milions d’aquí a 30 ans. Tanben se prevei l’aumentacion dels còstes de las concessions aeroportuàrias e comercialas, que segurament se repercutaràn dins los prèses de las bilhetas. Dempuèi bèl brieu fa, un collectiu de lucha contra la privatizacion de l’aeropòrt de Tolosa trabalha a sensibilizar las populacions dels perilhs environamentals e economics d’aquesta venda.
 
L’aeropòrt de Tolosa-Blanhac per ara serà teoricament contrarotlat —al 50,1%— pel sector public (Cambra de Comèrci e d’Indústria de Tolosa [25%], region de Miègjorn-Pirenèus [5%], departament de la Nauta Garona [5%] e estat francés [10,01%]). Mas los dos arrèstes ministerials preveson que l’estat se resèrva lo drech de vendre la totalitat del sas parts. S’aquò se passèsse, lo consòrci chinés passariá de l’estatut de decideire oficiós (degun non crei pas a una majoritat publica de blocatge) a l’estatut de decideire total e oficial de la politica aeroportuària de la capitala lengadociana.
 
Aquesta decision de dilapidacion del patrimòni economic e logistic occitan es estada presa dins los burèus de París sens concertacion vertadièra. Localament, levat l’oposicion d’EELV, la resisténcia politica a aqueste diktat es estada fòrça timida. A qualques meses de la fusion de las doas regions de Lengadòc-Rosselhon e Miègjorn-Pirenèus, es un còp dur portat al país e a sos abitants que, amb lors impòstes, avián pagat aquestas infrastructuras.
 
 
 
 
TL

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

antalya apraquital
5.

#4 En materia de comerça ai pas jamai vist un chinés far una pachacada.... Se l'an crompat, an d'idèias darrer lo cap , t'en faguessas pas..! E un còp plan asaigat s'en trobarà de mond per bastir un autre aeropòrt. Benlèu que desvoloparant la vila mieg ròse los chinéses plan milhor que l'estat francés e plan milhor que los occitans...
Caldria prener contacte amb aqulses chinés per aver las entresenhas de l'aeropòrt en occitan atanben... atal farem una brave socializacion.....

  • 2
  • 0
Guilhèm Tomàs Tolosa
4.

Una androna se sentís un pauc dins aquela istòria. Los chineses auràn pas lor retorn sus investiment.

L'aeropòrt es ja arribat a sa talha maximum. Vos remembri que se parla totjorn de far bastir un autra aeropòrt dins l'encontrada de la vila (mas degun ne vòl... urosament...). Cossí faràn per multiplicar per 2,5 lo nombre de visitors ? La quita vila de tolosa poirà pas sonque recebre 9 milions de visitors de mai per an. Lo ventre de la vila es ja plen a ne crebar.

La melhora estrategia pels chineses es gaireben de voidar l'aeropòrt de tota sa valor e de lo tornar vendre lèu fach a qualqu'un d'autra.

  • 2
  • 0
antalya apraquital
3.

#2 Vertat lo vinhòble bordalés es crompat a ronfles pels chinés.... apèi passaràn per la bogònha, puèi los autres....
E un matin nos despertarèm sarèm chinéses sens nos ne'en trachar...!
SEgurament sarà corses de chinés per tot lo mopnd. Per çò qu'es de las minoritats linguisticas que se parlon pas, coma l'occitan, anatz vèire las 56 minoritats en China.....
Mai polida la vida te crev !

  • 2
  • 0
vinhairon St Tropetz
2.

Practic per exportar en avion lo vin dei plantiers bordalés comprat per lei quites chinés!

  • 3
  • 0
antalya apraquital
1.

E i a una clausa qu'estipula que l'estat s'aopausarà pas a las decisions dels actionaris majoritaris.....
Lèu las anoncias de Blagnac en chinés, anglés, francés e se damòra de plaça en occitan... pr'aquò crèsi que cal pas comptat sus aquò....
L'estat vend tot çò que pòt, Alsthom, Alcatel, Blagnac..... ardit de qual sarà lo que ven ???? Benmèu occitània tota.....

  • 2
  • 0

Escriu un comentari sus aqueste article