De bravas partidas de XIII se jogavan aquesta dimenjada sus mai d’un front: campionats d’Elèit, juniors e autres; Superliga e Cup; NRL... e cada partida aguèt son pes de baticòrs, de suspens, de jòias e de lagremas...

A 30 punts la qualificaion
 
En Elèit1, èra l’ora dels quarts de finala. Dissabte a Domèc, l’AE Carcassona èra en apèl aprèp la crisi intèrna e un jòc un pauc fosc e escur entre dirigents, entraïnaires e jogaires. Es la pausa que marquèt la superioritat locala a la 39a minuta, lo dobertura d’Avinhon trapava una 40-20. Mas, a la sortida de la mesclanha, Samson interceptava la palma, trasmetiá al centre Guiraud 60 mètres mai luènh que mandava l’alièr Peacock entre los pals: 18-6 a la pausa per Carcassona. Tre la represa, en ataca classica, Clement Sobeiràs ajustava un ensag. L’AE Carcassona menarà 31-6 aprèp un ensag de son capitani, Teddi Saddaoui, abans de levar lo pè per ganhar fin finala 31-20.
 
Dimenge, al Molin, Lesinhan dobriguèt la marca tre la primièra minuta, mas a la pausa lo planchòt indicava: Limós 26-8! Los limosencs avián passada cinc còps la rega blanca! Lesinhan capitèt a tornar a 26 pertot. Murcià, en penalitat, tornèt balhar l’avantatge als Roge e Negre que van acabar en plegar a doas minutas de la fin: 30-28. Lesinhan es passat pel pichon trauc de la sarralha. Dissabte, als Minims de Tolosa, aurem doncas las mièjas finalas Dragonets-Carcassona (14 h) e Tolosa-Lesinhan (16h).
 
En Elèit 2, Albi e l’Escura son qualificats per las mièjas finalas que se jogaràn dins una quinzenada de jorns a Sant Gaudenç. Albi rescontrarà lo ganhant del barratge Vilafranca-Sant Gaudenç, e l’Escura aquel de la partida Baó-Tolosa Broncos.
 
En juniors, la finala del 9 de mai se jogarà entre Limós (venceire de Carcassona: 30-23) e Avinhon (venceire de Sant Estève: 41-24) que visarà lo doblat.
 
 
Los Gigants tròp grands pels Dracs
 
Pels Dracs, las setmanas se seguisson e se semblan. Mièja ora de jòc al meteis nivèl que los adversaris, dètz minutas mancadas e 22-8 a la pausa per Huddersfield que venç fin finala 38-14.
 
Los Dracs se trapan en desena posicion a la mitat del campionat, mas lo quatren a solament dos punts d’avança.
 
La jornada se dobriguèt dijòus amb la victòria de Wigan sus Warrington 30-20 e se contunhèt divendres per Leeds qu’anèt ganhar 41-16 a Saint Helens: doas partidas de tria que se joguèron a de ritmes elevats. A Wigan, a la pausa, s’anoncièt lo retorn de la Nòva Zelanda de Sam Tomkinsper las sasons venentas.
Dissabte, a 18h, los Dracs recebràn Hull KR a Brutus: una victòria es mai que jamai necessària.
 
Quatre esquipas de Superliga disputavan un torn de Cup e Salford se faguèt batre per una formacion de l’escalon inferior, Leigh: 22-18.
 
 
Cap a tres en NRL
 
En Austràlia, en campionat NRL, aprèp sèt jornadas, tres esquipas menan lo classament amb 10 punts: La Tempèsta de Melbourne, los Dracs de Sant Jòrdi e los Cavals Fòls de Brisbane. Uu tombat de Cooper Cronk a 40 segondas de la fin permetèt als jogaires de Melbourne de batre los Pols de Sydney: 17-16. Mai susprenenta: la darrièra plaça de las Aglas de Mar de Manly qu’an ganhat qu’una sola partida dempuèi la debuta de la competicion.