Bandièra01 1180x150: Comuna de Tolosa

Actualitats

De milièrs de personas an manifestat en Austràlia contra lo barrament de 150 comunautats aborigènas

De manifestants amb una bandièra aborigèna australiana lo 1r de mai
De manifestants amb una bandièra aborigèna australiana lo 1r de mai

Las autoritats australianas estúdian de daissar sens servicis basics los vilatges, ont vivon a l’entorn de 1000 personas. Lo primièr ministre de l’Austràlia Occidentala reconeis “lo grèuge” que causarà aquela mesura, mas explica que las comunautats son insostenablas. La campanha SOS Blak Australia ditz que de demorar dins la tèrra ancestrala “es un drech uman intrinsèc”.


De milièrs de personas manifestèron lo 1r de mai dins divèrsas vilas d’Austràlia contra lo barrament de 150 comunautats aborigènas ont vivon a l’entorn de 1000 personas. Las autoritats australianas estúdian d’executar lo barrament ongan. Las protèstas se debanèron dins las principalas vilas del país, compreses Sydney, Brisbane, Melbourne e Adelaïda.
 
Los manifestants, convocats per la campanha SOS Blak Australia, considèran que lo barrament d’aquelas comunautats seriá un desastre per lors abitants aborigèns. Los pòrtavoses de la campanha remembran que lo fach d’aver de partir de lors territòris ancestrals supausariá un grèu impacte cultural e una violacion dels dreches d’aqueles grops aborigèns: “Demorar dins las nòstras comunautats pròprias e dins lo nòstre país pròpri es pas una causida d’estil de vida, mas un drech uman intrinsèc e fondamental”, çò an dich.
 
La campanha SOS Blak Australia nasquèt de las comunautats menaçadas dins la region de Kimberley, la mai septentrionala de l’estat de l’Austràlia Occidentala. Amb una superfícia de 423 000 quilomètres cairats, Kimberley a una populacion abituala d’aperaquí 35 000 abitants, que lo 40% ne son aborigèns.
 
 
Finançament federal talhat
 
En 2014, lo primièr ministre de l’Austràlia Occidentala, Colin Barnett, anoncièt qu’entre 100 e 150 comunautats, plaçadas dins d’airals isolats a respècte dels principals centres de populacion de l’estat federat, demorarián sens servicis basics, çò que n’entraïnariá lo barrament. O diguèt après que lo govèrn federal australian aprovèsse de reduccions budgetàrias dins lo finançament per la mantenença de servicis coma l’aiga, las estradas, la collècta d’escobilhas o l’electricitat.
 
Barnett a admés alavetz que los barraments causaràn “un grand grèuge als aborigèns que se deuràn desplaçar” e que pòdon implicar “de problèmas dins las vilas de la region ont s’installen [aquelas] gents aborigènas”. Mas lo primièr ministre a dich tanben que las comunautats mai pichonas “son pas viablas” e que compòrtan tota una seguida de problèmas coma “los nauts indèxes de suicidi, de basses nivèls d’educacion e santat [....] e una manca d’emplec”.
 
En coïncidéncia amb las manifestacions del 1r de mai, Barnett a nuançat sa posicion, en assegurar que “s’expulsarà pas degun de la siá tèrra”. Ça que la, lo primièr ministre a insistit que l’Austràlia Occidentala poirà pas pagar los servicis que lo govèrn federal quitarà de finançar, e doncas, que i aurà de comunautats que demoraràn sens aqueles servicis.
 
 
 
 

Aquesta nòva es adaptada de Nationalia amb qui Jornalet a un acòrdi de cooperacion.
 
 
 
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tàrrega Igualada (PP.CC:)
3.

I pensar que fa 300 anys tan sols els Aborígens vivien feliços a Australia, hi hauria d'haver terra per tohom, i per antigüitat i respecte ja que son els autentics habitants, ells haurien de tenir preferencia. Nomès cal dir que a Amèrica hi han viscut durant milers d'anys els autòctons tenint un Paìs intacte, i que en poc mès de 400 els blancs ho han destruit tot.
Ernest, "El Tàrrega".

  • 0
  • 0
Felip Martèl Montpelhier
2.

Es pas inutil de precisar la color politica d'aqueu govèrn australian, conservator, e qu'a pas trop d'interés per l'umanisme, coma o indica sa politica vès los refugiats.

  • 1
  • 0
Pirolet
1.

Los australians fan de colombs blancs amb lo tabat en Tasmania e de corbasses amb los aborigèns. Sempre la duplicitat anglosaxona! Los meteisses qu'an fargat la legenda negra suls espanhòls en America mentre qu'exterminavan los amerindians a America del Nòrd.

  • 2
  • 0

Escriu un comentari sus aqueste article