Bandièra01 1180x150: Comuna de Tolosa

Actualitats

Rodés: s’amassaràn divendres per crear l’Assemblada Nacionala Occitana

La tòca d’aquela estructura transversala “es d’obtenir la reconoissença de l’existéncia de la nacion occitana e lo sieu drech a l’autodeterminacion”

| https://fr.wikipedia.org/wiki/user:Cronimus
Divendres que ven, 24 de julhet, se debanarà a Rodés una reünion dels principals actors e representants de l’occitanisme per crear l’Assemblada Nacionala Occitana (ANÒC). L’eveniment es dobèrt a totes los actors de l’occitanisme, que sián d’independents o de sòcis d’associacions, de partits o d’autras entitats, e la tòca es de crear “una organizacion populara, unitària, plurala e democratica qu’a per tòca la reconoissença de la nacion occitana e lo sieu drech a l’autodeterminacion e a l’independéncia sota la forma d’un estat de drech, democratic, social e ecologic”.
 
“L’objectiu de l’ANÒC es de reünir a l’entorn d’un consens, d’una vision comuna, toti li fòrças vivi de l’occitanisme politic, que siga autonomista ò independentista, per trabalhar toi ensems”, çò ditz lo niçard Ciril Joanin, un dels promotors de l’ANÒc, dins una entrevista sus A Vòste. Joanin precisa que “la finalitat es d’obtenir la reconoissença de l’existéncia de la nacion occitana e lo sieu drech a l’autodeterminacion. Aquò passa per un trabalh constant de terren per desalienar la populacion occitana, restaurar la consciéncia nacionala, generalizar e oficializar l’ensenhament de l’occitan, etc. Doncas l’ANÒC es una organizacion principalament politica. E mai se li compauantas culturali e lingüistiqui i entran tanben en lo sieu plan d’accion.”
 
A l’ora d’ara an confirmat lor assisténcia de representants de l’Assemblada Nacionala Catalana d’Aran, de Libertat, del Partit de la Nacion Occitana, d’Iniciativa per Occitània, de l’ADÒC, del CAÒC, de la Republica de Niça, de la RF Occitana e d’independents que vendràn un pauc de pertot en Occitània.
 
La reünion se debanarà a 14h al Licèu Querbes, 29 carrièra Maurice Bompard, a Rodés.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tàrrega Igualada (PP.CC.)
1.

Visca, som'hi, som'hi.
"El Tàrrega".

  • 1
  • 0

Escriu un comentari sus aqueste article