Bandièra01 1180x150: Comuna de Tolosa

Actualitats

crotz-tolosaCreated with Sketch.AuvèrnheAuvèrnheLimanha

Clarmont-Ferrand: la Nuèch de Pè a blocat lo conselh municipal

Lo collectiu denóncia d'intimidacions e una repression policièra desproporcionada. La polícia acusa los manifestants de “far degenerar” lors intervencions

| Nuit Debout Clermont-Ferrand
La Nuèch de Pè bloquèt divendres passat lo conselh municipal de Clarmont-Ferrand. La session prevista deviá tractar una sola question: “la nòva tarificacion enfança-joventut”. Mas lo movement dels indignats nomenat Nuèch de Pè (en francés Nuit Debout) interrompèt la session, que venguèt una arena politica, segon çò que rapòrta La Montagne. Un braç de fèrre se tenguèt entre lo cònsol socialista Olivier Bianchi e un quinzenat de membres del collectiu Nuèch de Pè, que planhián las menaças d’èsser evacuats de la Plaça de Jaude ont son acampats dempuèi un mes.
 
Après tres oras de discussions e d’incompreneson, las fòrças de l’òrdre expulsèron los manifestants de la sala e de l’ostal de la vila. Lo bilanç oficial es d’un policièr ferit e d’un manifestant detengut.
 
 
Se daissaràn pas “intimidar”
 
Dissabte, lo collectiu Nuèch de Pè de la capitala d’Auvèrnhe s’amassèt dins una assemblada generala per parlar de l’afar al conselh municipal e de las menaças d’èsser deslotjats. En seguida publiquèron un comunicat ont podèm legir:
 
“Nueit de Pè Clarmont-Ferrand a investit lo conselh municipal per reclamar lo dreit de restar sus la Plaça de Jaude de jorn coma de nueit, per far viure la democracia. En seguida de nòstra interpelacion, ges de responsa favorabla dau cònsol màger es estada prononciada. La polícia nacionala es doncas intervenguda a la demanda d’Olivier Bianchi. Las fòrças de l’òrdre an lèu emplejat la violéncia.... las calòssas, lo gas lacrimogèn e los tasers son estats utilizats maugrat la resisténcia pacifica dau trentenat de membres de la Nueit de Pè. D’elegits/elegidas municipals tanben an agut lo brut.
 
 “Nòstre movement se laissarà pas intimidar per aquela repression policièira e denóncia las practicas abusivas dau cònsol màger per far taisar un movement que saqueta lo sistèma politic e son autoritat. Es per tant que sèm tornarmai sus la Plaça de Jaude e convidam trestots a nos venir jónher”.
 
De son costat, lo director departamental de la seguretat publica desmentiguèt aquelas acusacions en tot dire qu’èra la volontat dels manifestants de far degenerar l’intervencion policièra, çò rapòrta La Montagne.
 
En responsa a aquelas declaracions, lo collectiu de manifestants a publicat un vidèo sus lor pagina Facebook que mòstra la violéncia de la polícia e son utilizacion dels tasers.
 

 
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Qoelet
1.

Lo collectiu denóncia d'intimidacions e una repression policièra desproporcionada. La polícia acusa los manifestants de “far degenerar” lors intervencions. Lo problèma es que se "los joves" (e los vièlhs ?!!!) intervenon pas coma o fan, serà pas en anant simplassament e passivament votar que poiràn esperar lo pus mendre melhorament de la situacion actuala. Alavètz, a despart d'o petar tot, qué far mai ?

  • 15
  • 0

Escriu un comentari sus aqueste article