Bandièra01 1180x150: Comuna de Tolosa

Actualitats

La nòva region centrala d’Occitània se nomenarà “Occitània”

L’assemblada plenièra de la region a aprovat aquela denominacion per 85 vòtes contra 60

| Joan-Francés Laffon
La region centrala d’Occitània, fruch de la fusion de Lengadòc-Rosselhon e Miègjorn-Pirenèus a adoptat lo nom d’“Occitània”, acompanhat del sostítol “Pirenèus-Mediterranèa”. L’assemblada plenièra de la region a aprovat aquela denominacion per 85 vòtes contra 60.
 
Los elegits partisans del nom an soslinhat lo respècte del procès participatiu ciudatan e de la cultura del país. Los opausants an criticat lo vòte ciutadan mancant de campanha, an apelat a l’indivisibilitat de la Republica Francesa e an quitament entonat de fragments de la Marselhesa.
 
Ara, l’assemblada de la nòva region nomenada Occitània, Pirenèus-Mediterranèa, avisarà lo govèrn francés del nom causit per la region, puèi lo Conselh d’Estat francés deurà validar aquel nom abans lo 1r d’octòbre. Pasmens la decision ciutadana es pas inalienabla e las autoritats de l’estat an totjorn lo darrièr mot de dire. Aquí s’acabarà lo procès ciutadan d’aquela granda consulta sul nom de la region.
 
 
“Occitanie” ganhèt largament lo vòte ciutadan
 
“Occitanie” (Occitània) ganhèt, largament, lo procès participatiu per causir lo nom d’aquela region. Lo 45% de las 203 993 personas que votèron causiguèron aquel nom.
 
Los autres tres noms que se podián causir, “Languedoc” (Lengadòc), “Occitanie-Pays Catalan” (Occitània-País Catalan), “Pyrénées-Méditerranée” (Pirenèus-Mediterranèa), se situan entre lo 10 e lo 12%.
 
Los vòtes se comptabilizèron amb lo metòde de Condorcet.
 
 
De contrapartidas pels catalans
 
De totas las opcions, la sola qu’inclusiá una referéncia a Catalonha èra “Occitanie-Pays Catalan”, mas lo bas pes demografic del territòri catalan dins la region a fach impossible qu’aquela opcion s’impause. “Es una denegacion totala de l’identitat catalana”, çò declarèt l’adjoncha al cònsol de Perpinhan Anabelle Brunet.
 
Per compensar tot aquò s’ofriràn de contrapartidas als catalans. D’un costat, Delga a parlat de la creacion d’un Ofici Public de la Lenga Catalana e d’installar a Perpinhan la capitala de l’euroregion Pirenèus-Mediterranèa.
 
En mai d’aquò, de representants del mitan politic e social, partisans del nom “Occitània” per la region, son arribats a un acòrdi amb los catalans, qu’èran partisans del nom “Occitània-País Catalan”. Eles acceptaràn lo nom “Occitània”, e en escambi “d’avançadas significativas dins la presa en compte de la «catalanitat» al sen de la nòva region”.
 
 
 
 
Editorial: A ganhat Occitània. E ara que fasèm?

Lo blòg occitan de France 3: Occitanie : un nom et des valeurs que certains voudraient évincer de LRMP

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

E Passa Que TAi Vist Lo Clapàs (Montpelhièr)
15.

#13 Om pot pas reprochar a un triangle de pas ésser un rond, a un avèsque de pas ésser atèu. O a un elegit de la republica francimanda, que siague de drecha, d'esquèrra, de drècha extrèma o d'esquèrra extrèma de pas ésser quauqu'un pus qu'un afrancesat parisiano-jacobin. Un afogat de l'ideologia parisenca, qu'a fach seu l'ideal de la republica francimanda : devenètz totis d'aparisenquits, i-a pas res en defora d'aquo. Sustot pas l'oc. Per aqueles que l'avian doblidat, La Delga es pas la "diva sorprèsa que reviscolaria l'oc", es una elegida de la republica fran-ci-man-da. E res de mai. Es aqui per ajudar Paris a admenestrar una region francesa, pel benefici de la republica francimanda de Paris . Alara l'oc dins aquo, m'as comprès...

  • 5
  • 0
Francesc Palma de Mallorca
14.

Occitània. Cat

  • 0
  • 0
Gerard Cairon Florentin d Albigés
13.

Anatz sus la pagina" Facebook" de la Carole Delga; tot i es ( dins son commentari de l'inauguracion del " Grand Fenetra", manifestacion folclò-patesejaira tolzana( ont la lenga s'emplèga pas que per cantar! e sovent amb l'accent ponchut)
- per ela, las Landas de Gasconha son pas occitanas, que son plaçadas sus un punt equivalent a Portugal o Ucraina!!!
- la celebracion de las tradicions d'un còp èra es un signe clar: l'occitan a pas d'avenir!
Quina vergonha:
- Amb'l nom que pòrta, solide que sos reires parlavan pas qu'occitan!
-Benlèu que coneis solament pas Peire Bec, un òme fòrça ligat a la vilòta de Casèras ( dins la circonscripcion de Delga) , romanista occitanista internacionalament conegut. Li faria de ben, a la Carole Delga, de legir, pas que lo pichon "Que sais-je" del Peire Bec sus la lenga occitana. aprendria, al mens, ont son los limits del territòri occitan.
- Benlèu que li faria de ben, tanben, a la Carole Delga, d'aprigondir un bocin la pensada de Jaurès sus l'Occitan ( emai se nomenava pas, d'aquel temps, la lenga aital) al luòc de se servir de qualques citacions , per claure dins l'unanimitat los discorses fastidioses que nos servisson ara los" socialistas".
Tot aquò, pas que per dire, qu'amb de responsables politics d'aquela mena, emai amb "Occitanie" en bandièira, i a lo de que de se tracassar!!
A totes los que s'esperbadavan d'estrambòrd, e que cridan " A l'òbra sèm", podèm dire "Anatz-i", per que d'òbra n'i aurà....

  • 4
  • 0
Gwenn
12.

Segur qu'es una avançada... pels que nos vòlon desolidarizar ! Avètz dich "contradiccion" ?

De legir los comentaris, se vei plan que si jamai aquel afar èra una manòbra per espetar dins l'uòu lo reviscolament de l'occitanitat dins l'esperit, lo còr e lo fètge dels Occitans, es una capitada. O pensavi abans, o pensi encara...

Las tensions intèrnas de l'occitanism foguèron benlèu jamai tant fòrtas que dempuèi aquela apelacion novèla. Òscas als aculturats (... d'Occitània centrala) ! Òscas als monilhistas (... d'Occitània tota) ! Òscas als Provençalistas (... occitans) ! Òscas als Novèls Aquitans (... enfin als Aquitans tot cort) ! ... Perque, finalament avèm l'impression que venon de se desrevelhar, mas totjorn per plorar o criticar aprèp ! E sèm pas qu'a la debuta de las contradiccions sus aqueste afar.

Es plan de legir un nom sus una mapa, si i a pas degun per s'i identificar, aquò val pas res.

Ara la causida es facha, e se la caldrà plan fadar. Enfin... benlèu pas longtemps que vos rapèli a totes (coma èra dich tanben dins l'article), que lo mot darnièr serà lo del Conselh d'Estat. E me pensi que totes los refractaris seràn alara contentats e aplaudiràn una decision prevista e previsibla que nos rapelarà a quin punt lo nòstre pais e los nòstres eligits se fotan completament de las identitats culturalas e lingüisticas non francesas sul territòri. Agachatz la primièra reaccion dels eligits de la region "Occitanie - Pyrénées-Méditerranée" : an cantat la Marselhesa !!! Soi segur que la mitat ne comprenon pas lo sens de las paraulas, mas sabon al mens qu'es pas en occitan... quitament si son origina l'es. Mas bon sèm pas a una contradiccion prèp.

Es coma l'ajust dels jos-titols "Pyrénées-Méditerranée", que foguèron ajustat per rapelar qu'Occitània es mai bèla... Mas aparentament, an doblidat que los Pirenèus e la Mediterranèna son tanben mai bèls e depassan largament las termièras de la region... E puèi, es pas grèu si aqueste nom ("Pyrénées-Méditerranée") es dejà lo nom d'una entitat regionala europeenca (Aragon, Catalonha, Isclas-Balearas e ancianas LR-MP). Sèm pas a una contradiccion prèp disiai...

çò que caldrà reténer dins aqueste afar e que sèm plan franceses ! Dins lo sens que sèm totjorn a criticar los eligits pels quals avèm votat. Espèri totjorn qu'òm pòt aprene de sas errors e qu'enfin aurem la preséncia d'esperit de votar per las personas que nos representan vertadièrament (quora existisson) e non pas per desfals. Encara una contradiccion...

  • 13
  • 2
Cafi
11.

Cossi vesetz tot e còp lo vèire mitat vòtge e jamai mitat plen....
Ah tanben...doblidatz pas de parlar occitan dins ka vida vidanta...e quicòm mai lo telefon amai çò mobils daissan passar l'occitan....òc ben ai testat .... e aquò rai va plan.

  • 2
  • 4

Escriu un comentari sus aqueste article