Fin finau, eth govèrn d’Iraq qu’a decidit de conquistar era vila de Mossol pr’amor qu’ei era vila mès grana que i a encara en territòri iraquian e serie un còp mortau entar Estat Islamic. Pendent es darrères ores eth Prumèr Ministre iraquian, Haider Al Abadi, anoncièc publicaments deluns passat qu’era campanha militara entà conquistar-la a ja començat. Era anóncia contunhèc ja damb divèrses seguides d’atacs d’artilharia e er avanç de centenats de veïculs armats entar exterior dera vila. Mentretant, es sòns abitants corrien a crompar minjar e es soldats islamistes bastien de mès en mès tunèls entara sua defensa.
 
Era batalha se harà entà conquistar ua vila qu’a viscut jos era terror extremista qu’a impausat es mesures mès dures a ua populacion qu’a volut húger en tot moment. Mès gésser Mossol non ei estat bric aisit. Es que prenien en tot voler húger èren punidi damb multes milionàries. Era soleta excepcion se hège as qu’avien quauque parent que siguèsse soldat dera armada iraquiana. Aqueri èren decapitadi.
 
Dilhèu a causa des mesures impausades pes islamistes era resisténcia a creishut ena gent dera vila, qu’encara a apròp d’un milion d’abitants. Segons es estatsunidencs, aué i a entre 3000 e 4000 combatents que luten cada dia contra es islamistes. Hè solament quauques setmanes, 58 persones sigueren fusilhades pes islamistes per formar part d’un complòt entà conquistar tanben era vila. Eth sòn cap ère un oficiau que trabalhave prèp d’Abu Bakr Al Baghdadi, çò arreportèc Reuters.
 
Mossol siguec ua vila que queiguèc en mans islamistes en 2014 damb solament 1000 combatents islamistes contra mes de 60 000 soldats dera armada iraquiana e era sua polícia. Quand pogueren entrar ena vila es sòns abitants èren mès que contenti. Totun, lèu cambièren eth pensament pes estrictes normes des islamistes. Siguec proïbit de humar, e tanben es tatoatges, e se hèn execucions cada dia. Segons fòrça hugitius, plan de gent qu’abans li shautave era preséncia des islamistes ena vila, ara vòlen acabar damb aquerò.
 
Ath delà, i a avut decapitacions ath costat de murs damb era letra mīm  —iniciala deth mot مقاومة [muqawama], o “resisténcia” en arabi— que son testimòni de cèrta resisténcia as islamistes maugrat que sigue mès-lèu simbolica. D’auti son estadi decapitadi solament per aver utilizat Internet. Eth mond des proïbicions en Mossol non a fin.
 
 
Ua crisi economica prigonda
 
Era intelligéncia estatsunidenca confirme qu’ena vila i a tanben ua prigonda crisi economica. Hè pòqui mesi, es islamistes perderen eth contraròtle des camps de petròli apròp de Raqqa, en Siria, e de Qaiyara, en Iraq. E es camins que jonhen aquera vila d’Iraq damb eth territòri jihadista sirian son estadi barradi pes aliats. E per aquerò eth comèrci s’ei vist fòrça redusit.
 
Era lum electrica solament pòt èster utilizada pendent dues ores cada dia, e i a barris sancèrs que ja non an aigua. Era majoritat des escòles son barrades pr’amor qu’es professors non vòlen trabalhar sense crubar. Es quites soldats der Estat Islamic avien vist coma eth sòn salari decreishie de 400 a solament 100 dolars per mes.
 
E tot açò mentre es imams contunhaven de demanar voluntaris entà lutar contra es infidèus mès damb cap de succès enes darrères setmanes, segons çò qu’arrepòrten tanben hugitius de Mossol qu’an arribat a ues autes viles jos contraròtle aliat. Ath delà d’aquerò, contunhen es recèrques entà trapar armes enes cases des abitants dera vila.
 
Ça que la, era resisténcia creish cada dia e es cinc grops que i a de resisténcia ena vila aucissen as soldats islamistes tostemps, maugrat qu’ac an de hèr de manèra individuau. E en camp de refugiats de Dibaga, en Curdistan, es aliats ja an trapat mès de 300 desertors dera armada der Estat Islamic, segon çò que confirme Ardalan Mohiadin, cap deth camp de refugiats. En aqueth camp ja i a mes de 43 000 refugiats dont mès d’11 000 son arribadi en seteme d’enguan. Damb eth començament dera batalha pera vila de Mossol ne demoren fòrça mès. Es prediccions parlen d’enquia 1 milion de refugiats —çò confirmen es Nacions Unides—.
 
Aguest madeish mes, eth president estatsunidenc Barack Obama a previst er enviament de  615 soldats mès entà ajudar ara ofensiva de Mossol e tanben entà sostier es trabalhs d’intelligéncia e assisténcia logistica. Açò que hè un totau de mès de 5000 soldats des Estats Units en Iraq. “Ac demoram tot —çò diguec Sabah Al Numan, pòrtavotz des fòrces antiterroristes iraquianes— aguesta ei era darrèra grana vila d’Estat Islamic en Iraq e era luta serà heròtja. Ja non pòden anar entà cap de lòc mès.”
 
 
 
 
Christian Andreu