Un ciutadan còrs a denonciat d’umiliacions de la Gàrdia Civila espanhòla contra el a l’aeropòrt de Barcelona, a causa d’un pegasolet independentista catalan qu’èra pegat sus l’ordenador portable de sa calinhaira. Après far sa denóncia, la victima, Claude Lefebvre, e sa companha, Roser Farràs, an detalhat a VilaWeb çò que se passèt.
 
Se passèt dijòus a miègjorn. Lefebvre tornava dins son ostal, dins la vila de Calvi, en Corsega, après un sejorn de tres meses en Catalonha en çò de sa calinhaira. Deviá prene l’avion a 12h45 devèrs Marselha, e aquí far la correspondéncia amb un autre avion devèrs son illa. Aürosament arribèt pro d’ora a l’aeropòrt e après tota l’umiliacion patida, aguèt l’astre de mancar pas son avion a la darrièra minuta.
 
Segon çò que Lefebvre conta, los problèmas comencèron al moment que passava son bagatge a man per l’escanèr del contraròtle de seguretat de l’aeropòrt catalan, e accedissiá a la zòna d’embarcament. Los agents li demandèron de traire los aparelhs electronics, e el sortiguèt l’ordenador portable. Quand un agent de la Gàrdia Civila espanhòla remarquèt que i aviá un pegasolet de l’Assemblada Nacionala Catalana (ANC) amb una bandièra estelada, lo policièr li diguèt “Aquò non, aquò non!”. El respondèt: “Òc, Catalonha, independéncia”. E l’agent repliquèt; “Non, non”. Sul pic lo policièr faguèt sonar l’alarma de l’arc-vòut de seguretat e arribèt còp sec un autre policièr de la Gàrdia Civila.
 
L’agent lo prenguèt pel braç amb fòrça, l’escorcolhèt e lo menèron dins una saleta de l’aeropòrt. Lo faguèron esperar dètz minutas sens dire res. Quand lo policièr que l’aviá escorcolhat intrèt dins la sala, Lefebvre demandèt de s’assetar, mas o li permetèron pas. El insistiguèt, pr’amor que patís una lombalgia, mas lo li autorizèron pas fins que lor mostrèsse un document medical qu’o certificava. Li demandèron perqué portava aquel pegasolet sus l’ordenador. E mai se compren ben lo catalan e l’espanhòl que parlavan los agents, Claude Lefebvre ensagèt de se far comprene a mièg en espanhòl e a mièg en francés, coma o podiá, en explicant que s’agissiá de l’ordenador de sa calinhaira.
 
Los policièrs espanhòls contunhavan de li demandar perqué un ciutadan francés portava un pegasolet coma aquel sus l’ordenador. “Te cal comprene qu’es per seguretat, e a causa de la menaça terrorista que i a”, çò li diguèron. Lefebvre lor respondèt qu’aviá ben remarcat que se trobava ailà non pas per l’ordenador mas pel pegasolet, e un dels policièrs o li confirmèt: “De segur, tu ès francés e pòrtas aquò”.
 
 
“Sap quitament pas parlar!”
 
A la fin semblava que se comprenián, e Lefebvre pensèt doncas que tot èra acabat e que podiá partir. Pasmens, quand tornavan al contraròtle de seguretat, l’agent que l’aviá escorcolhat lo prenguèt tornarmai pel braç e li tornèt pausar la question, en tot cridar e davant tot lo mond: “Perqué pòrtas aquel pegasolet de l’estelada?”. “Es l’ordenador de ma femna”, çò respondèt el. “Sap quitament pas parlar!”, çò diguèt alavetz lo policièr en tot rire. En aquel moment, lo personal de seguretat se botèt a rire tanben.
 
Claude Lefebvre se sentiguèt umiliat. Demandèt son nom a l’agent que l’aviá escorcolhat e interrogat, mas aqueste lo li volguèt pas donar.


Un "tractament inadmissible e racista devèrs los catalans"
 
Lefebvre remarquèt que i aviá de camèras de seguretat e ara espèra qu’amb la denóncia que faguèt diluns en Corsega se pòsca identificar l’agent que l’umilièt per aver portat un pegasolet independentista catalan sus l’ordenador.
 
En mai de la denóncia presentada dins un comissariat de Bastia, Claude Lefebvre a tanben contactat lo consolat francés de Barcelona, que li a demandat un escrich amb lo detalh dels faches. Aquel meteis escrich se presentarà en catalan al Sindic de Greuges, qu’es lo defensor dels dreches de la Generalitat de Catalonha.
 
“N’ai informat per telefòn lo consolat francés a Barcelona, per que sián assabentats d’aquel tractament inadmissible e racista devèrs los catalans”, çò a dich a VilaWeb. Ara n’espèra una responsa.