Bandièra01 1180x150: Comuna de Tolosa

Actualitats

L’Aràbia Saudita e Russia reduson la produccion de petròli

Los dos païses cèrcan de “far pojar lo prètz del petròli al nivèl mondial e aital d’estabilizar lo mercat”

| ☭Acodered
L’Aràbia Saudita e Russia an anonciat aquesta setmana que reduiràn la produccion de petròli fòrça abans çò qu’avián dich. Ansin s’arribarà a un prètz pus naut del petròli al nivèl mondial; ja començèt de pojar fa doas setmanas. Los dos païses èran convenguts alavetz de demesir lor produccion de petròli pendent nòu meses, çò es entrò a març de 2018. E aquò tanben vòl dire que l’OPÈP, l’Organizacion dels Païses Exportaires de Petròli tanben o farà lèu, probablament pendent sa reünion annala que se tendrà a Viena lo 25 de mai que ven.
 
Ansin, l’OPÈP —qu’expòrta un tèrç de la produccion totala de petròli de la planeta— e Russia ja foguèron consentas fa qualques setmanas per reduire la produccion de petròli per far pojar lo prètz del petroli al nivèl mondial. Totun, lo prètz es pas gaire montat, pr’amor qu’encara còsta 50 dolars per barril mas es pas encara tombat fins als 30 dolars per barril, valent a dire lo prètz qu’aviá al començament d’ongan.
 
Segon l’acòrdi escrich qu’an signat aqueles dos païses, èran consents “per far tot çò possible per far créisser lo prètz del petròli al nivèl mondial e aital d’estabilizar lo mercat”. A mai, l’acòrdi tanben confirmava que i auriá d’autres reduccions de la produccion dels dos païses del mes de març d’ongan enlà.
 
En mai d’aquò, Russia e l’Aràbia Saudita tanben an anonciat que trabalharián pendent la reünion de l’OPÈP de Viena per poder arribar de far comprene als païses exportaires de petròli que totes los païses deurián demesir lor produccion pendent nòu meses: aital pervendrián a una pojada del prètz del petròli de portada mondiala.
 
Après l’anóncia d’aqueles dos païses, lo prètz del petròli a ja començat de créisser, amb una montada del Brut Intermediari de l’Oèst de Texas  (WTI), e ganhèt un 3,4% fins a aténher 49,45 dolars per barril. D’un autre latz, lo barril de brut Brent pojèt d’un 3,3%, fins als 52,52 dolars/barril. Los analistas an dich que se voliá ansin susprene lo mercat e far oblidar la reduccion de la produccion de Russia e de l’Aràbia Saudita.
 
 
 
 
Christian Andreu
 
 


abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Abdelkader Nimes
1.

Sembla, segon lo Conselh de la Lenga Occitana, que se diriá puslèu Arabia.

  • 0
  • 0

Escriu un comentari sus aqueste article