Anèrem al Fossat lo 2 de junh per enregistrar de dialògs. Sonque 5 escolans enregistrèron, pr’amor que dins lo futur espectacle, i a pas que 5 ròtles de mainatges. E lo demai de la classa visitèt lo teatre de verdura: es un teatre en exterior, gaireben un vilatge entièr de la talha reala!
 
 
Qu’es aquò, l’UDAC?
 
L’UDAC es una associacion de benevòls que fan un espectacle del vilatge d’abans (lo fan dempuèi 29 ans!). L’argent amassat servís a finançar l’espectacle de las annadas seguentas. En 2017, las representacions de “Janonet al país de Cocanha” se debanaràn del 28 de julhet al 26 d’agost, al Fossat.
 
 
Perqué lo pastèl?
 
Gràcias a l’espectacle, vos explicaràn tot sul pastèl que faguèt la riquesa de la region de Tolosa! Ne veiretz la cultura, la transformacion e l’utilizacion.
 
Lo pastèl es una planta utilizada per fabricar de tinta blava. Las fuèlhas maduras son espotidas e botadas en bòlas (las còcas), puèi las daissam secar. Per fabricar lo colorant, cal espotir las còcas amb una mòla que pesa una tona, e botar la posca dins l’aiga: lo teissut chauchat dedins ven blau en sortent.
 
Vos esperam nombroses a las representacions (en occitan o en francés) per sosténer aquela accion culturala del país! E veiretz, vosautres.
 
Sèm fièrs d’i participar!
 
 
 
 
Los calandrons de Pàmias
Léo, Timoty, Luc, Emilie, Albane, Louis, Salomé, Guilhem, Andrew, Juan, Léo, Barbara, Cathline, Anna, Quentin, Emerik, Julia, Mila, Vitalis, Naís... e Maria-Anna
            



            
        
    

fffff		fffff
	Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a. Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…