Bandièra01 1180x150: Comuna de Tolosa

Actualitats

Cauma de femnas en Polonha contra l’enebicion totala de l’avortament

De marchas massissas tenchas en negre en Polonha e dins divèrsas vilas europèas contra l'iniciativa legislativa antiavortista

Cauma de femnas polonesas a Berlin
Cauma de femnas polonesas a Berlin | Roger Suso
Cauma de femnas. Diluns Negre e protèsta de negre. De milièrs de femnas an fach cauma e son pas anadas al trabalh, ni mai a l'escòla o l'universitat. An tanben abandonat las tascas domesticas. Tot aquò contra la nòva lei de l’avortament que la prepara lo govèrn polonés.
 
La cauma de totas s'es menada a  bon tèrme d’un biais multitudinari dins totas las vilas del país. De Varsòvia a Poznan e de Gdansk a Cracòvia. Mas tanben a Londres, Berlin, Belfast o Brusselas. E mai s'es malaisit de far una seguida de la cauma, de milièrs de personas i an participat. A Varsòvia, fins a 30 000 personas, abilhadas de negre —en signe de dòl— an fach cauma e an protestat. La formacion extraparlamentària d'esquèrra Razem, una de las que cridavan a las protèstas, parla de 6 milions de femnas en Polonha tota.
 
A Berlin, ont la comunautat polonesa representa lo segond grop immigrat, darrièr  la turca, aperaquí 1200 personas se son acampadas al simbolic pont de Varsòvia, contra l'iniciativa populara, que demanda l’enebicion de l’avortament e prepausa de penas de preson per las femnas que fagan aquela practica dins las 12 primièras setmanas de gestacion, e tanben pel personal sanitari qu'assistisca un avortament.
 
La cauma de femnas, çò an explicat sas organizairas, amassa l'esperit de la lucha de las femnas d'Islàndia que participèron a una manifestacion, en 1975, amb una istorica cauma que paralisèt lo país en demandant l’equitat salariala amb los òmes.
 
L'iniciativa legislativa populara antiavortista, que segon son promotor Mariusz Dzierżawski l’avortament es "genocidi" e "olocaust", amassèt, pendent lo primièr semèstre de l'an, mièg milion de signaturas —compresas la de la primièra ministra Beata Szydlo, la del president Andrzej Duda e la del cap del partit Drech e Justícia (PiS), e de facto del país, Jarosław Kaczyński— per demandar un cambiament de lei. Tanben l'adesion de las ONGs pro-life.pl e Ordo Iuris. L'iniciativa, inspirada de las tèsis del republican estatsunidenc Gregg Cunningham, recebèt lo sosten de la conferéncia episcopala polonesa que la presidís Stanisław Gądecki.
 
Lo Parlament de Varsòvia acceptèt de portar al debat lo cambiament de la lei per 267 vòtes en favor (tant del govèrn coma de divèrses deputats de l'oposicion, del PO), 154 contra e 11 abstencions. A l'ora d'ara, la legislacion de Polonha —la mai restrictiva d'Euròpa aprovada en 1993— permet solament l'interrupcion de la grossesa en cas de viòl o d’incèst, quand representa un risc per la santat de la maire e quand lo fètus presenta de malformacions grèvas.
 
La futura lei reconeis solament l’avortament en cas que la maire siá expausada a un risc grèu. Incorpora tanben de penas de preson per las femnas qu’avòrten e aumenta de 2 a 5 ans de preson la condemna per los mètges que practiquen d’avortaments. Per lo PiS, formacion plan restacada a la poderosa glèisa catolica en Polonha, "la Constitucion garentís la proteccion legala de la vida de totes los poloneses, compresa la dels que son pas encara nascuts". Tot indica que la lei avançarà. Dzierżawski vòl tanben enebir la "pilula de lendeman”.
 
"Las femnas contunharàn de venir avortar em Alemanha. Amb lei o sens lei. Nos cal un avortament segur", çò a dich a Directa una representanta del collectiu Ciocia Basia, un ret polonés en Alemanha que facilita lo liure accès a l’avortament segur per las femnas de Polonha.
 
 
 
Roger Suso/Berlin
Article adaptat del jornal catalan Directa

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip Martèl Montpelhier
16.

#15 Aquesta istoria manca de lions… Los cropatasses mancan pas, per contra

  • 9
  • 0
Pirolet
15.

#12 Habemus papam!

  • 3
  • 0
ivan
14.


#7 no es pot afirmar amb tanta seguretat que la vida d´aquests nens sera així .

  • 1
  • 7
ivan
13.

#4 no es tracte pas d´una motivació purament religiosa hi ha raos cientifiques per oposar-se a l´avortament.

  • 0
  • 8
ivan
12.

#5 si es un afer nomes de dones per que comentes a respecte? a mes el nadó no es tracta pas d´una part del cos de la dona sinó que d´un altre esser i dubte molt que les dones poloneses estiguin interessades en aqueste mena de manifestacions(nomes se veuen pancartes en anglés) que assisteix aquests events son militants profissionals que viuen d´aço.

  • 0
  • 8

Escriu un comentari sus aqueste article