Bandièra01 1180x150: Comuna de Tolosa

Actualitats

Lo nom d’”Occitània” per la nòva region centrala marca totjorn la polemica dins l’occitanisme

Una letra dobèrta lançada pel collectiu Òc-Provença es ara signada per 15 associacions e per 73 personas del mitan occitanista d’Occitània tota, e contunha d’amassar de sostens

| Guillem Sevilla
Lo nom d’”Occitània” per la nòva region fruch de la fusion de Lengadòc-Rosselhon e Miègjorn-Pirenèus, marca totjorn la polemica dins l’occitanisme. Una letra dobèrta contra aquela denominacion, lançada pel collectiu Òc-Provença, es ara signada per 15 associacions e per 73 personas del mitan occitanista d’Occitània tota, e contunha d’amassar de sostens.
 
La region centrala d’Occitània, fruch de la fusion de Lengadòc-Rosselhon e Miègjorn-Pirenèus, adoptèt a la fin del mes de junh lo nom d’“Occitània”, acompanhat del sostítol “Pirenèus-Mediterranèa”, après un vòte de l’’assemblada plenièra de la region qu’aprovèt aquela denominacion per 85 vòtes contra 60. Los elegits partisans del nom soslinhèron lo respècte del procès participatiu ciudatan e de la cultura del país. Aquela denominacion deu èsser validada pel Conselh d’Estat francés abans lo 1r d’octòbre.
 
Mas aquela denominacion a trobat una fòrta oposicion en Catalonha Nòrd, territòri non occitan de la region, e tanben dins una partida importanta del movement occitanista que remembra que la region concernida cobrís aperaquí lo 36% del territòri occitan e concernís solament lo 35% de sa populacion.
 
"Avèm cujat oblidar los quites occitans”, çò ditz L’Indépendant per rapòrt a aquela letra dobèrta. De son costat Aquò d’Aquí soslinha qu’aquel “manifèst d’occitanistas pausa coma ingrats lors camaradas favorables a... Occitània” e La Setmana remarca que “los sòcis del collectiu Òc-Provença considèran que lo nom del país es estat confiscat”.
 
 
Anomalias, desinformacion e acusacions
 
Aquela letra denóncia d’anomalias e de desinformacions dins lo procès participatiu per causir lo nom de la region: creson que lo grand public que votèt coneissiá pas realament çò qu’es Occitània del temps que planhon un marrit foncionament del logicial de vòte. Mas sustot planhon que cap de las opcions que se podiá votar dins aquela consultacion aja pas comportat  pas un adjectiu ajustat al tèrme “Occitània” que clarifiquèsse que s’agís d’un terç del territòri.
 
En mai d’aquò, los signants planhon la duretat de la campanha e regrètan que las associacions e los particulars que son pas partisans del nom d’Occitània per aquela region sián estats acusats d’immobilisme dins l’encastre d’una dura campanha.
 
Deploran tanplan que lo nom d’Occitània siá registrat dempuèi abril de 2016 a l’INPI, perque aquò poiriá empedir que tota autra entitat administrativa del país poguèsse emplegar lo tèrme “Occitània”.
 
 
Occitània, un nom consensual per tot lo país
 
D’un costat an paur que los que desenant faràn servir los tèrmes “Occitània” e “occitan” patiscan una confusion que sas consequéncias se poirián revelar dramaticas. De l’autre, remembran que “las denominacions «Occitània» e «occitan» foguèron adoptadas per evitar l'ambigüitat causada per la practica anciana d'apelar lo tot (la lenga e son territòri) per una de sas partidas (provençal, mas tanben abans gascon o lemosin...)”.
 
 
Demandan d’èsser preses en compte
 
Per totas aquelas rasons, lo collectiu Òc-Provença e los signataris del manifèst demandan que se prenga en compte tot çò que de collectius e de personalitats dels territòris fòra la region concernida an portat a la reconeissença de la lenga e de la cultura occitanas, tant uèi coma long de tota l’istòria del país.
 
 
Manifestacion
 
En mai d’aquò, lo manifèst afirma que la causida d’aquel nom al profièch d’aquela sola region a beneficiat a las associacions que trabalhan “per la deconstruccion del domeni d’òc, en oposicion absoluda amb lo movement iniciat per Frederic Mistral”.
 
Per acabar, saludan “totes aqueles qu’an agut lo merit de remembrar qu’Occitània son quatre regions francesas e tanben de territòris situats dins d’autras regions o estats”, e convidan “desenant l’ensems del mond occitan a organizar una granda manifestacion untiària de defensa de la lenga e de la cultura occitanas, dins son vast ensemble inicial e dins la diversitat de sos parlars, dins una de las vilas uèi administrativament exclusas de l’Occitània francesa: Pau, Bordèu, Lemòtges, Clarmont-Ferrand, Arle, Marselha, Niça e tant d’autras”. Evidentament comptan amb lo sosten e la participacion dels occitanistas de la region ara nomenada “Occitània”. Esperam tanben los de las autoritats.
 
E mai se Jornalet es pas dins los signataris d’aquela letra dobèrta, la redaccion anóncia que donarà son supòrt incondicional a l’organizacion d’aquela manifestacion.
 
 
E ara qué cal far?
 
Mentre qu’esperam las reaccions a aquesta letra, Jornalet a mandat un petit questionari a qualques actors reconeguts de la lucha en favor e contra lo nom d’”Occitània” per la region eissida de la fusion de Lengadòc-Rosselhon amb Miègjorn-Pirenèus. Lèu ne publicarem un rapòrt amb las principalas reflexions e vejaires per tal de trobar de ponches de consens.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Oc Soïssa
58.

Me demandi si lo depòsit legau dau nom pròpre Occitanie a l’INPI ei recebable ?
Degun ne pòt s’apropriar un nom en francés tau que Paris o Médor, e empachar los autras de l’utilizar.

  • 0
  • 0
Oc Soïssa
57.

#56 «En luòc de criticar al Lengadòc per utilizar lo nom d'Occitània, seriá pas melhor que la rèsta de regions l'utilizatz tanben?» Justament, aquò’s pas possible pr'amor que lo nom en francés Occitanie qu’ei protegit en dreit per la region MPLR. Las autras administracions territorialas n’an pas l'autorizacion de l’utilisar.

  • 0
  • 0
Guillem Barcelona
56.

En luòc de criticar al Lengadòc per utilizar lo nom d'Occitània, seriá pas melhor que la rèsta de regions l'utilizatz tanben? Quatre grandas regions: Occitània èst (Gasconha), Occitània oèst (Provença, Daufinat, Niça), Occitània sud e Rosselhon (MPLR) e Occitània nòrd.

Me sembla a ieu mal qu'ignòren al Rosselhon, mas pensi que se bon que lo nom Occitània aja caractèr oficial

  • 5
  • 3
francesc palma de mallorca
55.

Que los provençals alcen la Copa Santa per celebrar que lo nom d'Occitania sia oficialment present.

  • 7
  • 4
Dumas Traquette 30
54.

bogre d'ase que siei !!! mais tu ne sais pas me répondre !!
amistats

  • 2
  • 1

Escriu un comentari sus aqueste article