Bandièra01 1180x150: Comuna de Tolosa

Actualitats

L'occitan serà lenga oficiala de l'Euroregion Pirenèus-Mediterranèa

Totes los ciutadans ja se pòdon adreçar en occitan als organismes de l'Euroregion sens "cap de problèma"

La Secretària Generala de l'Euroregion, Antònia Sabartés e lo Director del GECT, Philippe Mestre
La Secretària Generala de l'Euroregion, Antònia Sabartés e lo Director del GECT, Philippe Mestre | Ainhoa Gomà / Euroregion Pirenèus-Mediterranèa

Antònia Sabartés, Secretària Generala de l'Euroregion Pirenèus-Mediterranèa, s'engatja per que l'occitan siá "tostemps una valor ajustada per tot recrutament que siá". Çò ditz a Jornalet a prepaus de la publicacion d'una ofèrta d'emplec que considerava pas l'occitan. Sabartés anóncia la volontat de las quatre regions per cambiar los estatuts de l'Euroregion e i apondre l'occitan coma lenga oficiala. Declara qu'actualament totes los ciutadans pòdon ja s'adreçar en occitan als organismes de l'Euroregion sens "cap de problèma", e avança que lo sit internet serà lèu tanben en version occitana.


"L'occitan es totjorn una valor ajustada per tot recrutament que siá, tot projècte o iniciativa que faga l'Euroregion" a dich Antònia Sabartes a Jornalet a prepaus de la publicacion d'una ofèrta d'emplec que considerava pas l'occitan. La Secretària Generala de l'Euroregion Pirenèus–Mediterranèa a declarat que "malgrat la sensibilitat especiala de l'Euroregion quant a la lenga occitana, legalament cal convocar los pòstes en acòrd amb los estatuts", al delà "las quatre regions" –Catalonha, Illas Balearas, Lengadòc-Rosselhon, e Miègjorn-Pirenèus– "an ja acordat que quand se faga una reforma dels estatuts s'i apondrà l’occitan coma lenga oficiala".
 
Sabartés a tanben manifestat la "sensibilitat especiala vèrs l'occitan dels quatre govèrns que fan partida de l’Euroregion" e considèra que "pausa pas cap de problèma de recebre de documents en occitan". Es dins aquel sens que Sabartés a tanben volgut explicar que l'Euroregion Pirenèus-Mediterranèa es a trabalhar per que tot lo sit Internet siá tanben en lenga nòstra, aital coma o es ja en francés, catalan e espanhòl. Segon l'Euroregion, las ressorsas previstas per la traduccion del sit son estadas ja reservadas, e ara sonque manca lo trabalh de traduccion.  
 
Jornalet a contactat lo secretariat de l'Euroregion en veire una ofèrta de recrutament d'un encargat de mission de cultura publicada a la començança de 2012. Dins l'ofèrta se marcava coma critèris indispensables d'aver un nivèl avançat en espanhòl, catalan e francés, e s'anonciava que la jurada auriá tanben en compte lo bon mestritge de l'anglés. Ça que la, i aviá pas cap de mencion a l'occitan ni a la siá existéncia.
 
Lo fach que l'occitan siá pas requerit al meteis nivèl que las autras lengas oficialas dels territòris de l'Euroregion, o almens al nivèl d'una valor ajustada coma es lo cas de l'anglés, es en contradiccion amb la volontat del Parlament catalan e la legislacion catalana. En setembre de 2010, lo Parlament de Catalonha aprovèt la Lei de l'occitan, aranés en Aran, amb l'objectiu de desvolopar l'article de l'estatut de 2006 que determinava qu'en Catalonha i aviá tres lengas oficialas: catalan, espanhòl e occitan. Aquela oficializacion, ça que la, es pas arribada encara a totes los organismes publics catalans o que la Generalitat de Catalonha ne fa partida.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ninou Barcelona (Països Catalans)
5.

M'emociona veure que es continua lluitant perquè l'occità i els seus parlants recuperin els seus drets.

  • 4
  • 0
Maime Limòtges
4.

#3 L'aranés es dau gascon...

  • 4
  • 1
Vicent Valéncia
3.

Content amb la iniciativa. M'hagués agradat que estiguéssem los que manquen: gascons e valencians (la Comunitat Valenciana) e autres.

  • 4
  • 1
Miquel Banyoles
2.

Finalment!

El meu ple suport des de terres de la Baixa Garrotxa, a Catalunya! :D

  • 5
  • 0
Jacme Tolosa
1.

Lo fren principal es pas la Generalitat, malgrat lo cambiament de color politica de Barcelona, lo fren maximal es dedins lo sistèma de decentralizacion, del costat Estat francés, dedins las governança determinada pel sistèma de la decentralizacion dedins los Conselhs Regionals de tolosa e Montpelhièr.
Es per aquesta rason que totas las evolucions del sistèma de la decentralizacion de cap a un sistèma autonòma es una granda causa (demanda ARF dedins lo programa 2012 del candidat François Hollande), mas serà pas lo sol mejan per i arribar ; se cal pausar la question del contengut de las formacions universitàrias francesas en Occitània ; quinas son las loras qualitats o non-qualitats per una gestion d'un estatut de decentralizacion e quitament d'un estatut d'autonomia d'una federacion de regions (Conselhs Regionals) occitans.
Dins aquesta pensada lo programa del MoDem (Bayrou) o d'EELV (associat al Partit Occitan-RPS, e ERC) es mai clar, mai per una presa en carga de las realitats dels pòbles pirinencs, e lo programa del FdG (PCF, PdG, etc) es puslèu un retorn en darrièr, es un nacionalisme d'expansion que sembla talament a las «feudalitats» talament criticada pel FN-UMP-NC, mai tanben al programa de UPN-PP e PP.

  • 4
  • 1

Escriu un comentari sus aqueste article