De Palau del Vidre a Sydney, del Molin de Lesinhan a Salford, es una brava dimenjada de tretze que se tenguèt sus tota la planeta ovala.

Los Dracs en costum de gala
 
Dissabte, los Dracs jogavan a Brutus lor darrièra partida a domicili de la sason. Aprèp la desfaita de Widnes a Salford, sabián qu’acabarián a la setena plaça. Castleford veniá quèrre la primièra plaça al classament. Los primièrs temps vegèron un afrontament solide e ferme dels dos paquets d’avants. Mas a la mièja ora, lo centre Duport trauquèt la muralha defensiva anglesa, trapèt Escarré a nautor e l’arrièr anava puntar lo primièr ensag de la partida. Repicava a la còrna amb un ensag de funambul: just lo cap dels dets per pausar la pauma sus la linha al pè de la bandieroneta de canton amb tot lo còs en suspension fòraterrenc. 10-0 pels Dracs a la pausa.
 
Tre la represa, los catalans remontavan lo terrenc sus 80 mètres aprèp una intercepcion e Zeb Taia acabava l’òbra per un novèl ensag. Los Tigres metián a profièit una pèrda de bala catalana per marcar, mas Henderson e Eliot “Capblanc” Whitehead marcavan dos ensages plens de determinacion per signar un 28-6 saludat pels 10 000 espectators presents.
 
E ara, plaça a las pelhòfas: direccion Leeds aqueste dissabte; Leeds ont, per l’ora, los Dracs ganhèron pas jamai, mas tot acaba per arribar un jorn o l’autre! Los Dracs an tornat trapar un èime collectiu, una solidaritat e un plaser de jogar que seriá domatge d’arrestar tre aqueste primièr torn. Per sa part, Warrington reçauprà Widnes. Los perdents d’aquestas partidas n’auràn acabat de la sason.
 
Dins lo naut del tablèu, ont los venceires seràn en mièja finala e los perdents en barratge, Wigan reçauprà Huddersfield aqueste dijòus, puèi, divendres, lo primièr Saint Helens esperarà Castleford.
 
 
Los Pols un pauc desplumats
 
En Austràlia, èra ja lo primièr torn de las pelhòfas del campionat NRL. La sason es acabada per Melbourne batut per Canterbury 28-4 e pels Broncos de Brisbane despassats pel Queensland del Nòrd 33-20. Dins lo naut del tablèu, los Lapinons s’impausèron aisidament fàcia a Manly 40-24. Los Pols, ont Casty manquèt de gaire de marcar un ensag decisiu, pensavan d’aver fait l’indispensable en menant 18-12 a quauquas minutas del tèrme. En volguent assegurar una sortida de la pauma en tòca, l’arrièr dels Roosters se faguèt panar jol nas lo balon remandat per un jogaire de Penrith sus la pelena: ensag de las Pantèras, transformacion e un tombat a la còrna! Victòria sul fial de Penrith: 19-18. Los Pols son bons per un barratge contra lo Queensland del Nòrd mentre que Manly reçauprà Canterbury.
 
 
Bèla entama del campionat d’Elèit
 
D’aquel temps, lo campionat d’Elèit tornava prene en çò nòstre. Dissabte, es amb una esquipa jove, que los “estrangièrs” son pas encara de retorn, que lo campion tolzan recebiá Limós. Los audencs menavan 12-4 a la pausa abans de plegar 28-18. Vilanuèva demorava mèstra sus sa pelena fàcia a Avinhon: 24-12. Dimenge, partida sarrada a Lesinhan entre l’FCL e los Dragonets. Cada esquipa marquèt dos ensages mas, pels Verds e Blancs locals, Benausse ajustèt las doas transformacions e una penalitat: 14-8 pels lesinhaneses.
 
 
A Palau, Carcassona prenguèt lèu fait la partida a son compte: 24-8 a la pausa e 36-20 al final amb la primièra plaça al classament en prima.
 
Al programa de la dimenjada qu’arriba: Carcassona-Tolosa dissabte (6 e mièja a Domèc); tres partidas dimenge: Avinhon-Palau, Dragonets-Vilanuèva e, a l’Agulha, lo primièr dèrbi audenc de la sason entre Limós e Lesinhan.
 
 
 
 
Alan Roch