Qu’ei ja en marcha era organizacion dera 34au edicion dera Marcha Beret, que se debanarà eth pròplèu 3 de hereuèr de 2013. Era marcha d’esquí de hons qu’ei prebotjada peth Conselh Generau d’Aran e pera estacion d’esquí aranesa, Baqueira Beret, damb era collaboracion der Ajuntament de Naut Aran, era associacion Volentaris Val d’Aran e d’auti organismes e entitats.

Es inscripcions son ja dubèrtes a trauèrs deth sit web, enquiath 29 de gèr de 2013. Ena aguesta edicion, eth pagament dera inscripcion s’aurà de realizar per carta de credit, exceptat es clubs que poderàn seguir en tot hè’c via transferéncia bancària.
 
Es persones que non s’agen pogut inscríuer per mejan deth sit web qu’ac pòden hèr en persona es dies 1 e 2 de hereuèr ena Casa d’Acuèlh de Salardú.
 
“Enguan era Marcha s’adapte as exigéncies que compòrte era organizacion des Campionats d’Euròpa de Longa Distància. Ath delà, era Marcha Beret ei estada escuelhuda entara organizacion d’aguest campionat ena sason 2015/2016 e, en mes mai de 2016, era Val d’Aran acuelherà eth Congrès Euroloppet, ua reünion que se celèbre cada dus ans ena que i participen totes es Marches Europèes entà decidir e debáter sus es ahèrs tecnics e d’organizacion d’aqueth prestigiós circuit” çò manifestèc Marcos Viló, conselhèr d’Espòrts e Joenessa deth Conselh Generau d’Aran.
 
 
 
 
CGA/FM