Bandièra01 1180x150: Comuna de Tolosa

Actualitats

Los jutges egipcians fan boicòt a la nòva Constitucion de Mursi e supervisaràn pas lo referendum

Lo president egipcian, Muhammad Mursi
Lo president egipcian, Muhammad Mursi | Egipte des de la barricada

Ahmad Al Zand, lo president del Club dels Jutges, qu’es la principala associacion de la magistratura egipciana, anoncièt al començament de la setmana que los magistrats del país se son acordats per supervisar pas lo referendum sus la nòva Constitucion, previst pel 15 de decembre que ven.


En una conferéncia de premsa dins la sedença de l’organisme al Caire, Al Zand a explicat que los membres de l’associacion an decidit a l’unanimitat de far boicòt a la consulta populara convocada pel president egipcian, Muhammad Mursi.
 
Lo Comitat Constitucional aprovèt divendres passat, còp sec, los 234 articles de la nòva Constitucion, fàcia als creissents movements de protèsta contra Mursi, e en favor de l’ampliacion dels sieus poders presidencials per fin d’arrestar un ensag dels jutges de modificar la majoritat islamista dins lo Comitat Constitucional.
 
Lo projècte, que los egipcians votaràn en referendum lo 15 de decembre, consagra la sharia coma font principala de la legislacion. Los laïcs, los liberals e los crestians lo considèran coma una traïson a la revolucion e una via per l’islamizacion forçada del país.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article