Bandièra01 1180x150: Comuna de Tolosa

Actualitats

Rugbi XIII: Còp de freg sus Domèc

Avinhon l’empòrta fàcia als Dragonets: 28-18
Avinhon l’empòrta fàcia als Dragonets: 28-18 | FFR XIII
Dissabte al ser, sus l’estadi Domèc de Carcassona, fasiá pas un freg de lop mas un freg a pas metre un lop defòra! Per se rescaufar, Pià marcava dos ensags d’entrada e preniá lo pas sus una formacion locala, macada aprèp la desfacha a Lesinhan: linha de 3/4 remaniada, primièra titularizacion de l’arrièr, auséncia del capitani Saddaoui (fractura del nas), quatre juniòrs sus la fuèlha de match! Carcassona repreniá sos esperits mas Pià rajustava una penalitat e un ensag urós sus un còp de pè contrat. Lo jove alièr Alexis Escamilla marcava per l’ASC e los Catalans menavan 20-4 a la pausa.
 
Tre la represa, Lamelangi ajustava un ensag entre los pals. Carcassona se reviscolava un briconet amb un ensag de Sadrau (pilar plaçat a l’ala aprèp la nafradura del titulari en debuta de partida) e pel talonaire Nicòl, mas Pià confrmava sa superioritat amb una novèla penalitat e un cinquen ensag. Carcassona aviá fait çò qu’aviá poscut amb energia e volontat, mas victòria catalana indiscutabla: 34-14.
 
Per contra, en tèrra provençala, los Dragonets dobrissián la marca, mas Avinhon preniá pichon a pichon lo melhor per ganhar fin finala 28-18.
 
Dimenge, la temperatura èra mai doça (tot es relatiu) a Limós pel derbi contra Lesinhan. Dins una partida enlevada ont 9 ensags seràn marcats, se tornèt jogar la faula de la lèbre e de la tartuga. Tre la primièra minuta, los locals marcavan per l’alièr Teixidó que repreniá un còp de pè a seguir e i tornavan a la 4a pel centre Blanch aprèp una ataca ont la pauma anava d’una ala l’autra. A la 13a, novèl còp de pè a seguir del dobertura Ramage: Teixidó sauta lo mai naut e punta l’ensag. A aquel moment, los Roge e Negre menan 16-0.
 
Mas, coma contra Carcassona la setmana passada, la maquina-diesèl lesinhanesa se met en branle: l’alièr Piquemal e lo centre Calegari (e transformacions de Benausse) concretizan los temps de dominacion de lor equipa. Al mai fòrt d’aquesta dominacion, Blanch intercepta una pauma dins sos 20 m e la va pausar 80 mètres mai luènh darrèr la linha dels vesitaires.
 
Amb una novèla transformacion de Ramage, Limós vira a la pausa amb un avantatge de 22 a 12. Mas tre la represa lo mesclanha Carrère jòga aprèp un cinquen tengut en tustant per el e amb una realizacion de l’alièr Poggi, las doas formacions se trapan a egalitat a 22 pertot. Ramage manca una penalitat, Wynn n’ensaca una: a la 67a minuta, Lesinhan passa davant e un ensag de Tribillac transformat per Wynn redusís a una punhada bufèca de confettis las darrièras esperanças limosencas: 30-22 pels vesitaires.
 
D’aquel temps, Vilanòva s’impausa logicament fàcia a Lescura: 44-18.
 
La dimenjada que ven, se jogaràn las darrièras partidas anar: dissabte, viatge complicat de Carcassona a Tolosa (17h, als Minimes), los Dragonets reçaupràn Vilanòva (St-Estève, a 19h). Dimenge, Limós anirà desfisar Pià en Salanca (15h30) e, al Molin, Lesinhan reçauprà Avinhon.
 
Aprèp, serà una pausa fins a la primièra dimenjada de genièr e los 1/8en de finala de la Copa Lord-Derby.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Los 1/8en de la Copa, que se jogaràn los 5 e 6 de genièr :
http://www.ffr13.fr/index.php/component/content/article/128/4360

  • 0
  • 0

Escriu un comentari sus aqueste article