Bandièra01 1180x150: Comuna de Tolosa

Actualitats

Rugbi XIII: La Copa per entamenar 20-XIII

L’annada 20-XIII serà una bèla annada pel rugbí de 13 amb, en particular, la tenguda de la Copa del Monde en octòbre e novembre en Euròpa. Per l’entamenar d’un biais occitan, notatz que lo Cercle Occitan del país de Carcassona festeja los Reis en preséncia dels trofèus (Campionat, Copas) de l’AS Carcassona XIII aqueste divendres 4 de genièr (18h , Ostal Sirventés).
 
La primièra dimenjada de l’an serà consacrada als 1/8n de finala de la Copa de França.
 
En cap d’aficha, dos afrontaments entre formacions d’Elita 1: dissabte a Domèc, a 6 oras de la tantossada, Carcassona reçauprà Vilanòva (l’an passat, la partida dels quarts s’èra acabada al punt de la mòrt!) e dimenge, al Molin, Lesinhan aculhirà Limós.
 
Tres partidas metràn en oposicion equipas d’Elita 1 e d’Elita 2: dissabte, Tolosa Broncòs reçaup Avinhon, puèi dimenge, lo Tolosa Olimpic anirà a Lion e a Baó se jogarà un brave derbi catalan entre la formacion locala e los Dragonets.
 
Doas equipas d’Elita 2 faràn part dels qualificats pels quarts. Seràn los ganhants de las partidas de dimenge entre Realmont e Tonens d’una part e entre Vilafranca de Roèrgue e Cavalhon d’autra part.
 
L’equipa de Lescura d’Albigés es dirèctament qualificada pels quarts aprèp la suspension de Pià de la competicion per la Federacion, qu’a refusat la proposicion de reintegracion faita pel Comitat Olimpic francés (levat revirament juridic de darrièra minuta).
 
Divendres 11, los Dracs catalans an causit Carcassona e la sala del Dòme per faire la presentacion oficiala de lor sason novèla.
 
Amb lo Jornalet, contunharem de vos téner al fial long de las setmanas d’aquela aventura esportiva e umana que nos balha buf e vam (sus la pelena o a l’estanquet) e qu’es una sorga de relacions e de paraula! Lo XIII, aquò òc!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article