Bandièra01 1180x150: Comuna de Tolosa

Actualitats

Los internautas son esmoguts pel suicidi del jove ciberactivista Aaron Swartz

Foguèt lo desvolopaire de l’RSS e luchava per l’informacion liura sus Internet

Los internautas son esmoguts pel suicidi d’Aaron Swartz dins lo sieu apartament de Nòva York. Aquel jove informatician e activista de 26 ans foguèt plan conegut pel sieu trabalh en favor de l’informacion liura sus Internet e per èsser lo responsable, quand aviá solament catòrze ans, del desvolopament de l’RSS, l’aisina que permet de s’abonar als contenguts en linha.
 
Swartz èra en espèra d’un jutjament per aver descargat en 2010 de milions de documents d’un archiu academic d’abonament en linha, lo JSTOR, amb l’intencion de difondre e balhar a totòm l’accès a aquelas publicacions literàrias e scientificas. Per aquel cas, riscava una pena de 35 ans de preson e un milion de dolars de multa.
 
Segon lo New York Times, un amic sieu lo trobèt penjat dins son apartament. Segon aquel jornal, un oncle de Swartz, Michael Wolf, diguèt que lo sieu nebot aviá escrich sus la siá lucha contra la depression e las pensadas suicidàrias.
 
Ara, dins aqueste comunicat, la familha del jove ciberactivista acusa dirèctament lo sistèma judiciari de secutament e intimidacion contra Aaron Swartz, e de voler punir “un presumit crime qu’aviá pas de victimas” amb un trentenat d’ans de preson.
 
 
“Voliá qu’Internet e lo Mond foguèsson mai justes”
 
La familha a remarcat l’engatjament de Swartz amb la justícia sociala: “Joguèt un ròtle decisiu per far tombar un projècte de lei de la censura dins Internet [la polemica lei SOPA], luchèt per un Mond mai democratic, un sistèma politic dobèrt e responsable, e qu’el ajudèt a lo crear, a lo bastir e a lo preservar, amb un vertiginós ventalh de projèctes academics qu’estendèron la portada e l’accessibilitat de la coneissença umana. Utilizèt los sieus gaubis prodigioses coma programaire e tecnician, non per venir ric, mas per far qu’Internet e lo Mond foguèsson mai justes e melhors. La siá òbra prigondament umana toquèt los esperits e los còrses a travèrs de generacions e de continents. Ganhèt l’amistat de milièrs de personas e lo respècte e lo sosten de fòrça milions mai”.
 
Swartz Foguèt cofondador del movement Demand Progress, qu’amb el promoguèt de campanhas en linha sus diferents tèmas socials. Amb aquel grop, dirigiguèt l’oposicion a la lei estatsunidenca SOPA, que prepausava d’enebir los descargaments del malhum.
 
Son nombroses los internautas esmoguts per la mòrt de Swartz. Es de soslinhar que lo creator del web, Tim Berners-Lee, a fach dins una fiulada sus Twitterlo comentari que seguís: “L’Aaron es mòrt. Vagabonds del Mond, avèm perdut un vièlh savi. Piratas pels dreches, ne sèm un de mens. Parents totes, avèm perdut un filh. Plorem.”

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Terric Lausa Quilhan
1.

Un suicidi ? Mmmh!

  • 1
  • 1

Escriu un comentari sus aqueste article