Lo campionat Elèit repreniá sos dreits aquesta dimenjada. La jornada soriguèt als vesitaires. Atal, logicament, Pià s’impausèt a Vilanòva 24 a 8 e Lesinhan marquèt 8 ensags a Lescura per ganhar 42-6.
 
En Provença, lo Tolosa Olimpic prenguèt lo revenge de l’anar en passant un 18-6 a Avinhon. De notar que la marca èra aquesida a la pausa e que, per un còp a 13, se marquèt pas un sol punt dins lo segond temps.
 
A Limós, lo tarrenc venguèt lèu un camp de patanas e la pauma una savoneta en rason d’una pluèja que tombèt gaireben de contunh. Se’n calguèt remetre, entre estatuas de fanga, a las originas del fòbal-rugbí e a las decas de man dels adversaris. Limós marquèt atal son ensag del primièr temps per Ramage (22a) e Carcassona son primièr per Aitken (27a) e son tresen pel jove Bastian Escamilla (68a) aprèp aver menat la pauma al pè (en dribbling!). En fòrça (38a), Osea Sadrau aviá permés als jaune e negre de menar 12-8 a la pausa. L’ensag del centre Hadfield (78a) arribèt tròp tard per contestar la victòria dels campions: 16-12.
 
Dissabte, Carcassona reçauprà Avinhon a Domèc (18h30) e Lescura anirà a Pià (16h).
 
Dimenge, una brava partida s’anóncia al Molin entre Lesinhan e los Dragonets (15h15).
 
La partida Tolosa-Vilanòva es remesa al 26, vist que lo Tolosa Olimpic jòga una partida amicala contra la formacion de Super-Liga dels London Broncos (dissabte , 18h, als Minimes).
 
De son costat, Limós reçaup dissabte (15h) las Aglas de Sheffield.
 
Los London Broncòs aniràn puèi desfisar los Dracs dimècres 23 pel sol rescontre amical dels Catalans abans la represa en Super-Liga. Los Dracs èran a Carcassona divendres per lançar oficialament la sason de Super-Liga: entrainament a Domèc, despaus esmovent de garba al pè de l’estatua de Pipeta e una serada dins la sala del Dòme que ramosèt mai de 1200 personas.

Dins l’actualitat, cal tanben notar la decision del Tribunal administratiu de validar l’exclusion de Pià de l’edicion 2013 de la Copa que los 1/4 seràn tirats al sòrt aqueste dimars.




Alan Roch