Bandièra01 1180x150: Comuna de Tolosa

Actualitats

Rugbi XIII: Clarificacions de febrièr

Aprèp lo rescontre ASC-Lescura, la version feminina aqueste dimenge 24 de febrièr a Rius de Menerbés
Aprèp lo rescontre ASC-Lescura, la version feminina aqueste dimenge 24 de febrièr a Rius de Menerbés
Demòra encara un pas de passar als Dracs per èsser mai fòrts: una capacitat de demorar concentrats sul jòc e disciplinats. Las penalitats e un novèl carton roge (per l’arrièr Webb aqueste còp) menèron divendres a la desfacha a Warrington, malgrat dos ensags de l’alièr Blanch: 26-18.
 
Sesilha de ratrapatge dimenge a Castleford. Abans una decison en apèl, lo pilar Julian Bosquet a pres 4 partidas de suspension.
 
En campionat, dimenge, Limós-Vilanòva se joguèt pas: encara un còp de Sénher Arrestat municipal que trapèt que lo terren èra impraticable.
 
A Carcassona, los campions agèron totas las penas del monde de se desempetegar dels valents Minotaures de Lescura. Marquèron ça que la 7 ensags per l’emportar 32-10.
 
A Pià, Lesinhan perdèt sus nafradura son menaire de jòc Nathan Wynn (dobla fractura a una man) mas resistèt bravament per pèrdre fin finala 23-16.
 
A Tolosa, los Dragonets se revelhèron per passar un 42-22 a la formacion locala qu’es totjorn amb uns resultats que son pas a la nautor de la qualitat de son efectiu. Aqueste dimècres, los tolzans reçaupràn Lescura pel compte del darrièr quart de finala de la Copa.
 
E, al programa del campionat, aquesta dimenjada trapam un prometeire Dragonets-ASC que poiriá èsser decisiu per l’obtencion de la segonda plaça darrèr un Pià qu’acabarà primièr la fasa de classament. Lesinhan reçauprà Tolosa, Avinhon jogarà a Vilanòva e Limós a Lescura.
 
E aqueste diluns de matin, dins los locals de Midi-Olympique (e òc!), la Federacion ven de revelar lo nom de l’entraïnaire anglés que prendrà en carga l’equipa de França en vista de la Copa del Monde. S’agís del responsable de Wakefield (una foncion que garda): Richard Agar que serà ajudat pel Jiròni Guisset, adjunt de Laurenç Fraissinós als Dracs. Lo trabalh de faire es bèl, vist l’ambicion afichada: lo retorn dels Pols dins las 4 nacions majas de la planeta tretzista e, doncas, una participacion a las mièja-finalas de la Copa del Monde de la tardor.




Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Tolosa se qualifica per als 1/2 de la Copa : victòria sus Lescura 42-8.

  • 1
  • 0

Escriu un comentari sus aqueste article