Bandièra01 1180x150: Comuna de Tolosa

Actualitats

L’estat francés enebís los vòls interiors d’avions qu’an una alternativa en tren de mens de 2h30

Desenant, cap de companhiá pòt pas far las connexions en avion entre l’aeropòrt de París-Orly e los de Bordèu, Nantas e Lion. Tanben se suprimís los vòls Marselha-Lion

Tèxte legit

La supression dels vòls d’avions qu’an una alternativa en tren de mens de 2h30 es ja una realitat dins l’estat francés. Desenant, cap de companhiá pòt pas far las connexions en avion entre l’aeropòrt de París-Orly e los de Bordèu, Nantas e Lion. Tanben se suprimís los vòls Marselha-Lion.
 
Èra una mesura  aprovada en 2021 per combatre l’escalfament global, mas caliá l’autorizacion de la Comission Europèa après lo recors depausat per l’Union dels Aeropòrts Franceses e la branca europèa del Conselh Internacional dels Aeropòrts.
 
Pasmens, los vòls de l’aeropòrt de París-Charles de Gaulle devèrs Bordèu e Nantas si que son permeses perque lo trajècte ferroviari es superior a 2h30. Totun, lo ministre francés delegat dels transpòrts, Clément Beaune, a celebrat la decision de la Comission Europèa, que constituís per el “un grand pas endavant dins la politica de reduccion d’emissions de gases d’efièch de sarra”. De lor caire, las associacions environamentalistas tròban que la mesura es tròp timida, e Greenpeace soslinha qu’un tèrç dels vòls mai frequentats de l’Union Europèa an una alternativa en mens de sièis oras, e que los enebir estalviariá 3,5 milions de tonas de CO2.
 
Lo projècte original demandava d’interdire totes los vòls que se poguèsson far en mens de quatre oras, çò qu’auriá afectat gaireben totes los vòls que jonhon la capitala francesa amb las principalas vilas occitanas. Las connexions de París amb Tolosa, Niça, Marselha e Bordèu representan lo 55% del transit, mas l’abséncia d’estructuras ferroviàrias permeton pas lo desplaçament en mens de 2h30, franc de Bordèu, qu’inaugurèt en 2017 una linha de nauta velocitat.




abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Batista Revel
1.

Fòrça bona novèla !

  • 11
  • 0

Escriu un comentari sus aqueste article