Bandièra01 1180x150: Comuna de Tolosa

Actualitats

Rugbi de XIII: a Albi, l’uòu de Pascas es una palma ovala!

| Dragons Catalans

Tèxte legit

Una granda jornada de rugbi de XIII s’anóncia per aqueste dimenge de Pascas a l’Estadium d’Albi amb la tenguda de cinc mièjas finalas de las Copas de França.


Los U15 dobriràn lo talh amb la confrontacion Carcassona-XIII Catalan; en U17, s’opausaràn Albi e Catalans; en Copa Luc Nitard dels juniors: partida entre Carcassona e Carpentràs. Las doas mièjas finalas de la Copa Lòrd Derby clavaràn la jornada: Carcassona-Avinhon a 5 oras del vèspre e Limós-Albi a 7 oras. Las finalas de las 4 competicions se tendràn lo dissabte 22 d’abril a Perpinhan.
 
 
Los Dragons se tiran de las urpas dels Tigres
 
Los catalans recebián Castleford a Brutus; l’escasença del retorn de Sam Tomkins dins la formacion. Sul banc a la debuta, remplacèt Pearce pel segond temps. Alrix Dacosta èra titulari al talonatge.
 
Al cap de 5 minutas, Paul Seguièr puntava un ensag que Kreighan transformava. Mas los Tigres replicavan e egalizavan. Los Dragons reprenián l’avantatge mercé a una penalitat. A la 25a minuta, Cesar Rougé lança Johnstone qu’i va de son ensag costumièr. Los catalans menan 12-6 a la pausa.
 
A la represa, Morgue serpenteja dins la defensa anglesa e marca (16-6). A la 56a minuta, los angleses marcan e tornan a 16-12. Los catalans son dins los 10 mètres advèrses, mas Jack Broadbent evita un placatge e travèrsa lo terren per marcar entre los pals. Amb la transformacion, los Tigres menan 18-16.
 
 
A cinc minutas del tèrme, Mike McKeen marca en fòrça, Morgue transforma e los Dragons ganhan 22-18.
 
Las causas s’arrengan pas per Wakefield, batut 38-0 per Saint Helens. Brava diferéncia 34-6 per las victòrias de Wigan a Leigh e de Warrington fàcia a Hull FC. Los Rhinocèros de Leeds s’inclinan cò d’Hull KR: 12-20. Huddersfield va ganhar a Salford 26-16.
 
Dissabte que ven, los Dragons, segonds al classament, recebon a Brutus (6 oras del vèspre) los primadièrs, los Lops de Warrington.
 
En Championship, Tolosa reçaup Londres a Ernèst Wallon aqueste divendres 7  e prepausa als espectators de prene part a un concors de penalitats.
 
 
Un 32-32 en NRL
 
Amb l’instauracion del punt en aur, es pas sovent que las partidas s’acaben sens venceire. Mas, aqueste dissabte, Manly e Newcastle clavèron lor partida sus un 32-32!
 
 
Dijòus, los Polets batèron las Anguialas 28-20. Divendres, Penrith anèt atomizar Canberra 53-12 alara que Melbourne anava batre los Lapinons a Sydney 18-10.
 
 
Dissabte, los Dragons de Sant Jòrdi dominèron los Dalfins 38-12 e los Tigres (darrièrs al classament) poguèron pas res contra los primièrs, los Cavals Fòls: 12-46.
 
Dimenge, las Anguialas menèron 20-0 fàcia als neozelandeses que refaguèron lor retard. Shaun Johnson passèt la penalitat que balhava l’avantatge a sa formacion 32-30 a la darrièra minuta. Lo tustaire de las Làmias manca la penalitat de l’egalizacion sus la còrna.
 
Entre Dògols e Vaquièrs, la partida foguèt plan disputada e los Vaquièrs menèron longament. Se fasián rejónher a la darrièra segonda per un ensag de Josh Addo-Carr, e Burton ensacava lo tombat de la victòria dels Dògols 15-14 dins las darrièras segondas de la primièra prolongacion.
 
 
Victòria al punt en aur pels Leopards
 
Lo calendièr d’Elèit 1 se metiá a jorn amb la tenguda d’una partida en retard de… la primièra jornada que se revelèt una confrontacion entre los darrièrs dos. Vilanòva bat Tolosa 25-24: aprèp l’egalizacion a 24-24 sus penalitat per Tolosa sus la còrna, Tomàs Lavesnes passa lo tombat e signa al punt en aur la tresena victòria de la sason pels aquitans! Lo XIII, aquò vos balha plan d’emocions !
 
 
 
 
Alan Roch
 
 
 
Imatge:
Sam Tomkins, lo genolh plan estropat, torna trapar lo terren jol malhòt catalan per sa darrièra sason esportiva
 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article