Bandièra01 1180x150: Comuna de Tolosa

Actualitats

L’independéncia e la demanda de dialòg amb ÈTA an marcat l’Aberri Eguna d’ongan

L’EAJ/PNV revendiquèt un “nòu estatut juridic politic” e demandèt de passes a ÈTA e al govèrn espanhòl. L’esquèrra independentista manifestèt a Pampalona. ÈTA publiquèt un comunicat per començar un “procès popular sobeiranista”.


Lo Partit Nacionalista Basco (EAJ/PNV) celebrèt ièr lo primièr Aberri Eguna (Jorn de la Pàtria) après recuperar lo govèrn de la Comunautat Autonòma Basca. Dins un acte multitudinari a Bilbao, lo president del partit, Andoni Ortuzar, diguèt que lo modèl de l’estat espanhòl “satisfà pas ni los bascos ni los catalans, e ara sembla que quitament pas los espanhòls”. Ortuzar apondèt que “se qualqu’un a de besonh d’un cambiament prigond, aquò es l’estat espanhòl”. Exigiguèt tanben a ÈTA qu’avancèsse cap al desarmament e, al govèrn espanhòl, que cambièsse sa politica penitenciària per una autra de “mai justa e intelligenta”.
 
Per Ortuzar, cal avançar cap a un “nòu estatut juridic politic” al Bascoat e, tanben, cal far de gèstes de totas parts per i establir la patz e la convivéncia: “ÈTA pòt far mai de passes e los deu far, de manièra unilaterala, sens demandar res a degun, sens contrapartidas, perque deu la patz als ciutadans bascos, non pas al govèrn espanhòl.” Lo president basco, Iñigo Urkullu, diguèt dins aquela meteissa linha qu’“ÈTA sap que deu acabar çò que comencèt, a pas cap mai d’alternativa”.
 
 
L’esquèrra independentista empliguèt las carrièras de Pampalona
 
De lor costat, de milièrs de personas participèron a Pampalona a la manifestacion convocada pel ret Independentistak (Independentistas) a l’escasença de l’Aberri Eguna, ont revendiquèron que “l’independéncia del Bascoat es la basa per resòlver los problèmas jornadièrs e far front a la crisi”. I participèron de membres de Sortu, Aralar, EA e Alternatiba, darrièr una granda bandièra basca e una pancarta amb lo mot “Independentzia”.
 
 
ÈTA es per un procès popular sobeiranista
 
En escasença d’aquela jornada, l’organizacion ÈTA publiquèt  un comunicat dins lo jornal Gara qu’explica qualas son sas opcions per avançar cap a l’independéncia e lo socialisme. En concret, considèra qu’“es ara lo moment d’organizar un procès popular” qu’implique fòrça sectors, “dempuèi lo movement obrièr fins a las institucions, amb l’objectiu de superar de barrièras” e “en aprigondissent las decisions de crear d’aisinas per la sobeiranetat del Bascoat”.
 
Aquel “procès popular” deuriá èsser “participatiu e democratic” e aver per tòca un estat basco, segon ÈTA, que sosten que la societat basca se tròba davant una “oportunitat istorica” per resòlver lo conflicte. “Lo Bascoat es arribat a aquel lindal viu e amb las pòrtas de la libertat dobèrtas”.
 
Dins son comunicat, ÈTA soslinha tanben que los sieus gaireben 700 presonièrs devon participar al procès en egalitat de condicions amb la rèsta e, doncas, “devon demorar liures”: “Es ora de far de passes coratjoses e decidits per accelerar lo procès que los mene a l’ostal”. Se i compren un remembre al presonièr Ángel Figueroa, mòrt fa pauc en cò sieu, mas per contra, aquel comunicat mençona pas Francisco Javier López Peña, àlias “Thierry”, que moriguèt abans ièr a París d’un infart cerebral.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article