Era delegacion espanhòla qu'a agut de superar eth dificil escuèlh dera estacion arpitana de Méribel, qu’en 2015 acuelherà es finaus dera Copa deth Mon dera Federacion Internacionau d'Esquí (FIS), e que volie refortilhar era sua imatge damb era preséncia des 225 jornalistes que participen abituauments en sòn campionat pròpri. Es arpitans que retirèren era sua candidatura pr’amor des nombrosi supòrts qu’auie artenhut era estacion de Baqueira Beret, que gaudirà d’aguest eveniment per tresau viatge ena sua istòria. Era candidatura aranesa que siguec votada per aclamacion, sense cap de vòt en contra.

 

Era equipa espanhòla que se desplacèc tà Mt Palandöken damb un petit nombre jornalistes esquiaires que, totun, s’apropèren ath pòdium enes diuèrses competicions. Es mielhors resultats que sigueren eth quatau lòc en Slalom Gegant de Cris Gibert (Barcelona TV) ena categoria Junior Femenina, e er ueitau lòc ena disciplina de Hons de Jaume Castell (La Guia del Esquiador/Telepirineus.cat) ena categoria Super Senior.

 

Aguest campionat que se debane toti es ans e qu'amasse a jornalistes esquiaires de mès de cinquanta païsi. Eth pròplèu an s’amiarà a tèrme en La Zuita (en italian Civetta) enes Dolomites, e en 2014 era Arpitània suïssa qu’acuelherà aguest eveniment mediatic en Champéry, un an abans qu'arribe tàs pistes araneses en 2015.

Ferriòl Macip