Bandièra01 1180x150: Comuna de Tolosa

Actualitats

Amassada de la Banca Centrala Europèa a Barcelona jos un fòrt dispositiu policièr

Lo govèrn espanhòl a suspendut lo Tractat de Schenguen entre lo 28 d'abril e lo 4 de mai

| Vilaweb

Uèch mila agents de las polícias espanhòla e catalana an pres las carrièras de Barcelona per la seguretat de l'Amassada de la Banca Centrala Europèa, que se debana uèi dins la vila catalana. Lo Tractat de Schengen es estat suspendut.


Barcelona es uèi la sedença de l'amassada del conselh de govèrn de la Banca Centrala Europèa (BCE). Per aquò, far qualques jorns que la vila es blindada per quatre mila cinc cents mòssos d'esquadra (la polícia autonomica de Catalonha) e tres mila cinc cents agents de las polícias espanhòlas. I a mila agents mai de çò qu'èra previst.
 
Pr’amor d'aquela amassada, lo govèrn espanhòl a suspendut lo Tractat de Schengen entre lo 28 d'abril e lo 4 de mai.  De fach, pendent las primièras ochanta oras de suspension del tractat, la polícia espanhòla a negat l'intrada dins l'estat a un trentenat de personas e n'a arrestadas dotze mai. Al delà, i a mai de mila agents suls passatges frontalièrs de Campfranc (entre Bearn e Aragon), suls que crosan Catalonha per La Jonquera, Portbou, Puigcerdà e Camprodon, e Occitània per Les (Val d'Aran), e dins los aeropòrts de Barcelona e Girona. Mai de 180 000 passants son estats contrarotlats.

Los govèrns catalan e espanhòl an organizat aquel important desplegament per empedir una eventuala arribada a Barcelona d'individús violents e antisistèma, mai que mai d'Itàlia e de Grècia, amb l'idèa "d'embestiar" l'amassada amb de susmautas coma las de la cauma generala del 29 de març.
 
Lo subjècte principal de l'amassada de la BCE serà la crisi dins l'Estat espanhòl.
 
Qualques collectius anticapitalistas an cridat a las protèstas. Una cauma d'estudiants es estada convocada per uèi contra l'aumentacion de las taxas universitàrias.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mahmut
1.

Aquera suspension de l'espaci Schengen, quina vergonha un còp de mei !

  • 2
  • 0

Escriu un comentari sus aqueste article