Bandièra01 1180x150: Comuna de Tolosa

Actualitats

L’Estat italian vòl ratificar la Carta Europèa de las Lengas Regionalas o Minorizadas

Se balha la possibilitat de l’ensenhament en occitan a l’escòla, de son usatge dins la justícia e de sa difusion dins los mèdias

La ratificacion de la Carta pòrta mai d'oportunitats per l'occitan dins l'Estat italian. Fòto: Vinai, Val d'Estura
La ratificacion de la Carta pòrta mai d'oportunitats per l'occitan dins l'Estat italian. Fòto: Vinai, Val d'Estura

Lo 9 de març, lo Conselh dels Ministres de l’Estat italian, presidit per Mario Monti, prepausèt un projècte de lei per ratificar la Carta Europèa de las Lengas Regionalas o Minorizadas, a la seguida de la proposicion del ministre dels afars estrangièrs e del ministre dels afars regionals. Aquela ratificacion serà un progrès de la Lei numèro 482 de 15 de decembre 1999, apelada “Nòrmas en matèria de proteccion de las minoritats lingüisticas istoricas”, que melhorarà la difusion de l’occitan.


Lo parlament deu aprovar aquesta lei per que l'Estat italian ratifique la Carta. Lo Comitat per la lenga sarda demanda que s'apròve al mai lèu possible "per l'interés de la democracia e pel respècte als dreches civils".

La proteccion de las lengas minorizadas prepausa, entre causas autras, la possibilitat de l’ensenhament dins las escòlas, l’usatge dins la justícia e la difusion de programas culturals dins los mèdias. Las lengas protegidas per aquela lei son 12: l’albanés, l’alemand, l’arpitan, lo catalan, lo croat, l’eslovèn, lo francés, lo friolan, lo grèc, lo ladin, l’occitan e lo sarde. La lei italiana considèra pas encara totas sas lengas.
 

La Carta Europèa de las Lengas Regionalas o Minorizadas es un document aprovat coma convencion pel Comitat dels Ministres del Conselh d’Euròpa dins la 478a amassada dels representants dels ministèris, lo 25 de junh de 1992 a Estrasborg. La Carta reconeis las lengas dichas regionalas o minorizadas coma expression de riquesa culturala e engatja los estats signants a far possible l’ensenhament dins aquelas lengas e tanben a las poder emplegar dins l’administracion, la justícia e los mèdias, entre d’autres domenis. Entrèt en vigor en s’aténher la ratificacion d’almens cinc estats, lo primièr de març de 1998.
 
L'Estat italian aprovèt la Carta en 2000, mas es ara que ven d’èsser ratificada. Per çò qu’es de l’Estat espanhòl, la Carta foguèt aprovada en 1992 e ratificada en 2001. Es pas estada ratificada per Mónegue ni per l'Estat francés, qu'accèpta sonque 39 disposicions de las 89 que compta la Carta.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article