Bandièra01 1180x150: Comuna de Tolosa

Actualitats

Los bretons an obtengut lor domeni dins Internet mentre que los galècs l’espèran per l’estiu

L’ICANN a aprovat la creacion del domeni de primièr nivèl “.bzh” qu’es ligat a Bretanha, sa lenga e sa cultura. L’associacion que n’a impulsat la demanda ditz que lo domeni serà operatiu abans la fin de l’an. L’Associacion Puntogal vei fòrça possibilitats per que lo domeni galèc siá tanplan acceptat.


Los bretons festejan que l’organisme que regula los domenis de primièr nivèl sus Internet, l’ICANN, aja decidit d’autorizar lo “.bzh”, lo domeni restacat “a Bretanha, sa cultura e sa lenga”, segon los promotors de la campanha. En una decision istorica, l’ICANN a tanben dobèrt la pòrta a d’autres domenis correspondent a d’entrepresas e al de la vila de París (.paris).
 
La campanha en favor d’un domeni breton comencèt en 2004 amb una fòrta participacion de la societat civila bretona, e comptava amb lo sosten del conselh regional de Bretanha e de divèrses conselhs generals del país.
 
Segon l’associacion qu’a impulsat la demanda —e qu’a amassat mai de 21 000 sostens—, los primièrs domenis “.bzh” poirián èsser disponibles al cors del segond semèstre d’ongan. L’entitat a dich que poiràn demandar lo domeni las personas residissent en Bretanha e tanben aqueles que, dempuèi la rèsta del Mond, se consagren a promòure la lenga e la cultura del país.
 
 
En Galícia espèran lo fuòc verd aqueste estiu
 
Un autre territòri qu’espèra d’aver lo sieu pròpri domeni de primièr nivèl es Galícia, ont l’Associacion Puntogal disiá lo mes passat que, segon sas previsions, lo domeni “.gal” poiriá demorar definitivament aprovat l’estiu que ven. L’entitat explicava alavetz que l’ICANN aviá pas trobat cap d’objeccion a la candidatura galèga.
 
Lo domeni es pensat pels webs ligats amb la lenga e la cultura galègas.
 
 
 
 
 

 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limòtges
3.

#1 Me sembla que coma es un nom de domeni restachat a la lenga e la cultura, utilizen lo codi iso sai-pus-que de la linga emb 3 caractèrs : .bzh, .cat, . gal. Quo siria .oci per l'occitan me sembla.

  • 2
  • 0
Eth Bandolèr Gargàs
2.

Quan non correspon pas a nat estat, que i cau tres letras tà representar lo domèni. Atau, per exemple, tres letras per Catalunya: cat , mentre que n'an pas sonque duas letras de besonh tà lo domèni corresponent a l'Estat d'Andorra: an. Eu qu'ei especiau pr'amor que correspon a ua associacion d'estats.

  • 2
  • 0
lo passejaire Tolosa
1.

Òsca ! Quora un nom en òc ? Lo jornalet.oc per exemple ! Mas un nom de domani s'escririá òc o oc ?

  • 5
  • 0

Escriu un comentari sus aqueste article