Bandièra01 1180x150: Comuna de Tolosa

Actualitats

L’Estivada a signat un acòrdi amb la Fièra Mediterranèa

Aquel acòrdi amb lo festenal catalan fa evidenta “una idèa de mercat artistic que parteja un espaci cultural, lingüistic e istoric comun”

L’Estivada de Rodés ven d’establir un acòrdi amb la Fièra Mediterranèa de Manresa (Païses Catalans) per doas edicions. L’acòrdi a per tòca de far conéisser los artistas catalans en Occitània, e los occitans als Païses Catalans, e de se far promocion mutualament. Amb aquel acòrdi Rodés aculhirà los concèrts de La Cobla Sant Jordi amb Roger Mas, Pep Gimeno el Botifarra e lo celèbre grop valencian Obrint Pas que farà son concèrt d’adieus en Occitània.
 
L’Estivada, lo Festenal Interregional de las Culturas Occitanas, arribarà ongan a sa vintena edicion e se debanarà a Rodés del 23 al 27 de julhet. E mai s’èra ja tot parlat, l’acòrdi se signèt diluns passat a Manresa per Patric Roux, director del festenal occitan, e Francis Blot, de la còla d’organizacion de l’Estivada, acompanhats de Lluís Puig, president del comitat executiu de la Fièra Mediterranèa, e Jordi Bertran. Per Roux, los artistas occitans an “la meteissa dificultat que los catalans” per promòure la lor cultura. Segon Roux, amb aquel acòrdi se fa evidenta “una idèa de mercat artistic que parteja un espaci cultural, lingüistic e istoric comun”.
 
La Fièra Mediterranèa es, al delà d’un dels festenals mai prestigioses de Catalonha, un mercat d’artistas e de viraires, ont se pòt trobar tota mena d’espectacles de musica, de circ, de teatre… En mai dels espectacles e dels concèrts i a de ponches d’amassada entre los artistas e los viraires.  I a tanben d’espectacles dels mai prestigioses dels Païses Catalans. Dins sa primièra edicion, fa mai de dètz ans, Occitània foguèt lo primièr país convidat, e dempuèi aquel moment los artistas occitans fan partida de la programacion d’aquel mercat d’artistas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mathieu Castel Amians
12.

#11 Cresi qu'es ligat a ma preséncia dins l'animacion deis estand puslèu. Diriau en 1999/2000 de memòria...

  • 4
  • 0
TG Gàbia
11.

#10 Aqui !

De fach, sabi pas qual n'es lo creator de l'Estivada. D'unes dison que ven de la Comuna, Marc Censi, lo conse de l'espòca, en cap de còla, e d'autres dison que ven de las associacions occitanistas.

A la conferéncia de premsa de lançament de Destibada, en mai, Patric Roux diguèt per far cortet (e, qu'aja fach cortet o pas, pas un jornalista relaièt aquò) qu'es lo CCOR (l'IEO 12) que primièr despausèt lo nom, per far, a comptar de 93-94, una jornada consacrada a la cultura òc. Ni lo CCOR (present), nimai la Comuna diguèron lo contrari. Mas, evidentament, l'Estivada comencèt a venir bèla a comptar del moment ont la direccion se deleguèt a Grenet.

Sabi pas en quala annada d'alhors : 97 ? 98 ?

  • 3
  • 0
Al Zeimer Neuròn
10.

#9 Ok !
E qual n'es lo creator?

Coregissi : Grenet lo director que faguèt d'Estivada un festenal bèl (e es pas per levar son meriti al director actual)

Correccion bis : caliá legir "aviá ensajat de far d'Estivada la meteissa causa que Manresa"

  • 2
  • 0
TG Gàbia
9.

#8 Al, as pas tot ton cap (estranhament) ! Grenet a benlèu endralhat tot çò que vòs, pasmens es pas lo creator d'Estivada, arribèt aprèp !

  • 4
  • 0
Al Zeimer Neuròn
8.

Bona causa!
Mas pas novèla.
Fa un pichòt desenat d'annadas, Christian Grenet, lo creator d'Estivada,aviá ja fach un partenariat amb la fira de Manresa e aviá ensajat de far d'Estivada la meteissa causa qu'eStivada : una fièra, un mercat e, coma o fan a Manresa, avián convidat a Rodés tot plen de mond productors, viraires, etc.
aviá endralhat l'idèa...

  • 2
  • 2

Escriu un comentari sus aqueste article