Bandièra01 1180x150: Comuna de Tolosa

Actualitats

crotz-tolosaCreated with Sketch.AuvèrnheAuvèrnheLimanha

Michelin licenciarà 730 salariats e investirà 800 milions d’èuros

Sedença de Michelin a Clarmont Ferrand
Sedença de Michelin a Clarmont Ferrand | Fabien1309
Lo fabricant de pneumatics Michelin a anonciat diluns passat que redusirà 730 emplecs. L’entrepresa auvernhata a revelat tanben l’investiment de 800 milions d’èuros per melhorar sa competitivitat e impulsar las exportacions.
 
Los emplecs desapareisseràn del sit de Joué-lès-Tours (Torena) e l’espandiment de la produccion se farà en 2015 al sit de La Roche su Yun (La Roche-sur-Yon, Peitau, Aguiaina). Las doas vilas son en França.
 
Aquela mesura convertirà la region maritima peitavina en un important centre de produccion per l’exportacion e “los melhors estandards de competitivitat” segon un comunicat de Michelin.
 
L’indústria automobila d’Euròpa s’es vista tustada per la crisi e sustot per las reduccions budgetàrias. Las vendas de veïculs son las mai bassas dempuèi vint ans e la demanda en pneumatics es, alavetz, plan flaca.
 
De companhiás coma PSA (Peugeot e Citroën), Ford e Faurecia an ja anonciat la reduccion de milièrs d’emplecs. Per aquò Michelin aviá avertit en abril passat que prendriá de mesuras semblablas se lo mercat non se melhorava pas.
 
Michelin a promés que 250 licenciaments seràn de retiradas estimuladas e que transferirà 480 salariats, del temps que 200, dels 930 que compausan la fòrça de trabalh del sit, passaràn a d’emplecs que son pas de produccion.
 
A prepaus dels investiments, Michelin destinarà 145 milions d’èuros per aumentar la capacitat a 30% o 40% de las doas fabricas que produsisson de pneumatics grands pels tractors e per las palas mecanicas. D’autres 220 milions d’èuros anaràn melhorar lo centre de recèrca e desvolopament en Auvèrnhe.
 
L’entrepresa auvernhata tanben a anonciat que quitarà de produsir de pneumatics pels camions en Argeria e que vendrà lo sit del país african al grop local Cevital, qu’a ja promés de pòstes nòus pels 600 salariats.
 
La companhiá a sa sedença en Clarmont Ferrand, emplega 63 000 personas en Euròpa e es lo segond fabricant de pneumatics del Mond.
 
Lo jornal francés Le Figaro ne publicava ièr un dorsièr fòrça complet e una entrevista amb Jean-Dominique Senard, director financièr de Michelin.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Michelàs Vichèi
2.

Òu Michelin, te chau metre la goma e far trabalhar las gents d'Auvèrnhe e d'Occitània ! I a de que far dins las planas de Provença ò de Lengadòc, i a de mond a emplegar que son a la chauma !

  • 3
  • 0
Jacme Tolosa
1.

Clarmont d'Auvernhe.

  • 5
  • 2

Escriu un comentari sus aqueste article