Bandièra01 1180x150: Comuna de Tolosa

Actualitats

Venèt poiriá far un referendum d’independéncia ongan

La campanha populara per l’independéncia de Venèt es arribada al conselh regional, que sembla dispausat a l’adoptar

D'independentistas venèts manifestèron per la lenga occitana a Carcassona en 2009
D'independentistas venèts manifestèron per la lenga occitana a Carcassona en 2009 | Guillem Sevilla
Amb la data del referendum sus l’independéncia d’Escòcia fixada al 18 de setembre de 2014, e la de Catalonha qu’es encara d’establir, aquestes darrièrs meses una autre país s’es apondut a aquela corsa. E benlèu poiriá arribar d’èsser lo primièr. Venèt se prepausa de recuperar la sobeiranetat de l’anciana Republica de Venècia, desmantelada per Napoleon en 1797. Lo 6 d’octòbre d’ongan, previsiblament, s’i fariá un referendum consultatiu, s’abans, lo 27 de junh, lo conselh regional, en reünion extraordinària, n’apròva la convocacion e la question: “Volètz que Venèt venga una republica independenta e sobeirana?”
 
I a agut tot un fum de passes fins a arribar aicí. Arunan, lo movement extraparlamentari Independéncia Venèta amassèt vint mila signaturas per demandar que se convoquèsse un referendum d’independéncia. E en novembre, lo Conselh de Venèt votèt una resolucion qu’autrejava al president, Luca Zaia (de la Liga Venèta-Liga Nòrd), lo mandat per començar d’establir urgentament de relacions institucionalas amb totas las institucions de l’Union Europèa e l’ÒNU amb la tòca de garentir que lo pòble venèt foguèsse consultat sus l’autodeterminacion.
 
E ara lo meteis grop, Independéncia Venèta (Indipendenza Veneta), a preparat un fuèlh de rota, assumit pel conselhièr Stefano Valdegamberi, de Futur Popular (Futuro Popolare), per demandar una reünion de totes los conselhièrs. Aquela reünion aurà d’aprovar o desestimar una possibla consulta, lo 6 d’octòbre. Per la convocacion d’aquela primièra reünion extraordinària, caliá la signatura de quinze conselhièrs, e se’n son obtengudas dètz e sèt. Lo president, Luca Zaia, a ja dich que se se presentava una proposicion de lei per convocar lo referendum, i votariá en favor.
 
Lo referendum serà lo resultat de tot aquel procès, s’arriba de se far, e serà de caractèr consultatiu. Pasmens, dins l’estrategia d’Independéncia Venèta, se considèra que, se la majoritat votèsse favorablament per recuperar la sobeiranetat, seriá un mandat democratic que lo govèrn italian poiriá pas mesestimar.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip Martèl Montpellhier
3.

Conselho totun au mond de s'entresenhar un pauc sobre ço qu'es la Lega Norte, entre corrupcion e ultra-drecha dura, sens interés particulier per las lengas minorizaas. Los Ladins dolomitans dau nord de la Region (Val Fassa, Fodom e Ampezzo) ne sabon quauque ren. Per quant als Friolans, son pas concernats de tot biais

  • 1
  • 0
Onorat Lerins
2.

Quitament se n'i a pauc en en Venècia, viva la libertat dei friolans (coma dei ladins e dei romanches) !

  • 1
  • 0
Terric Lausa Quilhan
1.

Lo vent de libertat bufa suls pòbles presonièrs dels estats imperialistas europèus e malaürosament Occitània se manten de costat.

Lo màger part dels occitans e una bona part dels occitanistas son encara a demandar mai d'estat francés per Occitània!

Serà long lo nòstre camin cap a la libertat...

  • 5
  • 0

Escriu un comentari sus aqueste article