Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Era Val d'Aran que vò gerir era sua riquesa naturau

Eth Sindic d'Aran que demane ath Parlament de Catalonha era segregacion de Naut Aran dera dera Resèrva Nacionau de Caça Naut Palhars-Aran

| Parlament de Catalonha

Eth sindic d’Aran, Carlos Barrera, qu'expausèc agèr dimèrcles 9 de mai en Parlament de Catalonha, era proposicion de Lei dera segregracion deth tèrme municipau de Naut Aran dera Resèrva Nacionau de Caça Naut Palhars–Aran, entà auançar ena accion dera gestion des recorsi naturaus deth país occitan. Era proposicion de Lei que plantege era segregacion d’ues 24 000 hectarèes, des mès de 106 000 qu'a era Resèrva Nacionau de Caça Naut Palhars–Aran.


Eth sindic d’Aran, tostemp en aranés, qu'expliquèc as deputats qu’aguesta demana d'Aran, respon ath "besonh d’auançar ena accion dera gestion des recorsi naturaus d'Aran, atau coma demore reflectit en tèxte dera Querimònia, dera quau eth pròplèu an se commemoren es 700 ans (1313-2013), d’autrejament  de fòrs e privilègis per part deth rei Jaume II d’Aragon, ara Val d’Aran”.

Carlos Barrera que soslinhèc qu’aguesta proposicion de lei refòrce eth hèt qu'en 1950 existie ja era Societat de Caça e Pesca dera Val d’Aran, damb era intencion de gerir, d'Aran estant, era riquesa naturau e ordenar es recorsi cinegetics e preservar es espècies, fòrça temps abans dera creacion, en 1966, per part deth Govèrn espanhòl, dera Resèrva Nacionau de Caça.

Eth Sindic qu'a rebrembat qu’en 1989 se creèc era zòna de caça contrarotlada de Naut Aran e Mijaran entà gerir eth profitament dera caça, çò qu'auèc lòc abans qu'era Generalitat de Catalonha traspassèsse es competéncies ath Conselh Generau d'Aran.

Es representants de totes es fòrces politiques deth Parlament de Catalonha s’i an mostrat en favor. Era Presidenta deth Parlament, Núria de Gispert, a comunicat ath Sindic era continuïtat dera tramitacion parlamentària dera proposicion de Lei entà amiar a tèrme era segregacion deth tèrme municipau de Naut Aran dera Resèrva Nacionau de Caça Naut Palhars–Aran. Non i aurà cap d'esmena de retorn.

Unitat d'Aran a mostrat tanplan eth sòn supòrt, per çò qu'era segregacion de Naut Aran dera Resèrva Nacionau de Caça de Palhars s'aprovarà damb eth supòrt de totes es fòrces politiques deth Parlament de Catalonha e deth Conselh Generau d'Aran.

Acompanhauen eth Sindic eth conselhèr d’Agricultura, Ramaderia e Miei Naturau deth Conselh Generau d'Aran, José Enrique Arró; representants de Naut Aran, dera Societat de Caça e Pesca dera Val d’Aran e eth baile de Les, Emili Medan.



Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article