Lo dijòus 6 d’abril de 2023, la responsabla del servici d’environament de la vila de Carcassona, Caroline Morettot e Arnaud Albarel, ajunt delegat a l’environament, venguèron rescontrar los CM2 de las doas calandretas de Carcassona per lor parlar de l’importància dels arbres dins lo mitan urban.

Nos informèron que Carcassona mena una campanha “zéro phyto”. Es a dire qu’ensajan d’utilizar pas brica de pesticidas per l’entreten dels espacis verds de la vila.

Nautres qu’avèm un vergièr e de bucs, sabèm plan l’impacte que pòdon aver los pesticidas sus las abelhas, e doncas sus la pollinizacion e la produccion de la frucha e dels legums.

Los pesticidas son tanben dangieroses per la santat publica, cap a las infiltracions dels produches toxics dins las jaças freaticas.

Nos sensibilizèron tanben a una problematica plan actuala: la de la secada. Ongan, lo pauc de plèuja tombada nos va confrontar a una manca d’aiga importanta pel demai de l’annada.

Aquel fenomèn risca plan de se perlongar e de venir la nòrma en cò nòstre, se fasèm pas pro per luchar contre lo rescalfament climatic.

Per contunhar d’aver d’espacis verds dins la vila, prenguèron la decision de plantar d’espècias qu’an besonh de mens d’aiga.

Comprenguèrem que la preservacion dels arbres en mitan urban es essenciala per luchar contra lo rescalfament climatic, perque l’ombra portada permet de limitar l’emmagazinament de la calor dins lo betum o lo quitran.

Los arbres son tanben essencials per renovelar l’oxigèn de l’atmosfèra e espandir pas lo trauc de la jaça d’ozòn.

Dins un segond temps, nos demandèron de dessenhar un arbre complet: es a dire amb totas sas partidas visiblas e non visiblas e d’i apondre tot çò que podiam de l’ecosistèma que i èra ligat: vèrmes, insèctes, aucèls, esquiròls, singlars e totes los animals que vivon mercé als arbres.

Lo Gaspard passèt puèi al tablèu per ne dessenhar un plan polit que nos permetèt d’afinar nòstras coneissenças suls arbres e sos ecosistèmas.

Nos ofriguèron puèi a cadun un libròt d’informacion sus la biodiversitat e los amainatjaments dels espacis verds a Carcassona e un saqueton de granas de plantas melifèras de semenar a l’ostal e a l’escòla per ajudar los insèctes pollinizaires.

Foguèrem fòrça contents de la vesita d’aqueles dos elegits e prenguèrem l’engatjament de faire encara mai mèfi a la natura e als arbres que nos pòrtan tant de causas bonas !

Tèxt escrit per las classas de CE2-CM1-CM2 de las calandretas de Carcassona

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…