Bandièra01 1180x150: Comuna de Tolosa

Actualitats

Macron s’amaga de la contèsta populara a la finala Nantas-Tolosa

Lo personal de l’estadi de França confisquèt los cartons roges, los fiulets e mai las bandièras bretonas

Macron s’amaga de la contèsta populara a la finala Nantas-Tolosa
Macron s’amaga de la contèsta populara a la finala Nantas-Tolosa

Tèxte legit

La contèsta sociala contra la reforma de las retiradas en França e lo biais autoritari de l’impausar se faguèt ausir tanben dissabte a l’estadi de França a l’ocasion de la finala de la Copa de França de fotbòl ont s’afrontèron Nantas e Tolosa e que vegèt la larga victòria de l’esquipa occitana (5-1).

Tanben la repression dirècta e preventiva se faguèt veire. Las autoritats volián enebir la manifestacion a l’entorn de l’estadi mas lo tribunal administratiu de París las contradiguèron lo quite dissabte en levant la restriccion e los sindicalistas de la CGT poguèron distribuir de milièrs de cartons roges e de fiulets per tal que los espectators, a la minuta 49 e 3 segondas, fiulèsson e mostrèsson lors cartons roges al president de França, Emmanuel Macron, present al rescontre. Ça que la, lo personal de l’estadi de França confisquèt los cartons roges, los fiulets e quitament las bandièras bretonas dels suportaires de Nantas.

Segon qualques jornalistas e observaires, a la minuta 49 s’entendèt de fiuladas a la tribuna ont se trobava Macron mas sens gaire de cartons roges. Sembla, totun, que las fiuladas s’ausiguèron pas gaire a la tribuna de la premsa, ont los jornalistas e comentators las qualifiquèron de "timidas".

Pasmens, Emmanuel Macron, decidiguèt de s’expausar pas e saludèt pas los esportius sul terren mas abans lo començament de la partida dins lo corredor discretament, sens retransmission sus l’ecran de l’estadi. Remetèt pas tanpauc la Copa al l’esquipa ganhaira sus la pelena, coma o auriá volgut la costuma, mas o faguèt de la tribuna estant.

Per aquela finala se mobilizèt aperaquí 3000 policièrs.

Mentretant, a Tolosa, si que s’ausiguèt una fòrta fiulada a la minuta 49 e 3 segondas sus la Plaça del Capitòli, ont de milièrs de personas seguissián la partida sus un ecran gigant.

 

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Aqueles quasi-fascistas an enebit los drapèls bretons per Bro Naoned ? E qué ne vira dels eventuals drapèls occitans pels suportaires de Tolosa ?

  • 10
  • 0

Escriu un comentari sus aqueste article